"ჩვენ დავადგინეთ, რომ ჰქონდა მას იარაღი, ამის დადგენა შეიძლებოდა, მაგრამ სხვა გზით იყო წაყვანილი გამოძიება. პროკურატურა აფარებს ხელს დამნაშავეს", — ეს განცხადება უმცირესობის დეპუტატმა და დროებითი საგამოძიებო კომისიის წევრმა სერგო რატიანმა პარლამენტის პლენარულ სხდომაზე გააკეთა, სადაც დღეს ხორავას ქუჩაზე, მოზარდების მკვლელობის საქმეზე შექმნილი კომისიის დასკვნაზე მსჯელობენ. სერგო რატიანი ამბობს, რომ გამოძიების საწყის და მომდევნო ეტაპებზეც არსებობდა საკმარისი მტკიცებულებები მიხეილ კალანდიასთვის ბრალის წასაყენებლად, როგორც მკვლელობაში თანამონაწილე.