კასპის მუნიციპალიტეტის სოფელ გომში წირვის დროს მიწა ჩაწვა. შემთხვევის შედეგად არავინ დაშავდა. ადგილობრივების ცნობით, ფაქტი თავდაპირველად, წყლის ონკანთან მისულმა ერთ-ერთმა ქალბატონმა შეამჩნია.

,,ამ ქალმა გაიარა მაგ ადგილზე, წყლის დასალევად მივიდა. როცა გამოიარა, ნახა ჩავარდნილი მიწა. ჩაიხედა და დიდი ორმო დაინახა. მერე გააგებინა მღვდელს, მღვდელმა კიდევ მეუფეს" - გვითხრეს ადგილობრივებმა.

სოფელში ასაკოვანმა ხალხმა გადმოცემით იცის, რომ ნათლისმცემლის ეკლესიის ეზოში, უძველესი მარნები არსებობდა. ამ ფაქტს ,,ქართლის ცხოვრებაში" დაცული ცნობებიც ადასტურებს. ვახუშტი ბატონიშვილის ცნობით, 1691 წელს ნიკოლოზ კათოლიკოსმა გომში დადგა მარანი და საწნახელი.

სოფლის წარმომადგენელი საკრებულოში ზურაბ ქოსაშვილი ამბობს, რომ ეკლესიის ეზო დაუყოვნებლივ შესწავლას საჭიროებს, რადგან არსებობს საფრთხე იმისა, რომ მიწა სხვა ადგილზეც ჩაწვეს.