დღეიდან „დაჭრილ მებრძოლთა თანადგომის ფონდს“ სათავეში კომპანია „სილქნეთი“ ჩაუდგება. რესპუბლიკა ივენთოლში „სილქნეთის“, „სილქროუდ ჯგუფისა“ და თავდაცვის სამინისტროს ერთობლივი მონაწილეობით, პროექტის პრეზენტაცია გაიმართა. ღონისძიებას საქართველოს პრემიერ-მინისტრი მამუკა ბახტაძე, თავდაცვის მინისტრი ლევან იზორია და თბილისის მერი კახა კალაძე დაესწრნენ. სპეციალურად მიწვეულ სტუმრებს შორის საქართველოს ტერიტორიული მთლიანობისთვის გამართულ ბრძოლებსა და საერთაშორისო მისიებში დაჭრილი და დაშავებული სამხედრო მოსამსახურეები იყვნენ.

მიწვეულ სტუმრებს სიტყვით საქართველოს პრემიერ-მინისტრმა და თავდაცვის მინისტრმა მიმართეს. სიტყვით გამოსვლისას ლევან იზორიამ ყურადღება დაჭრილი და დაშვებული სამხედრო მოსამსახურეების რეაბილიტაციასა და საზოგადოებრივ ცხოვრებაში მათი სრული ინტეგრაციის მნიშვნელობაზე გაამახვილა.

„დაჭრილ მებრძოლთა თანადგომის ფონდის“ დაარსების შესახებ ინიციატივა იმ მნიშვნელოვანი წამოწყების გაგრძელებაა, რომელიც 2016 წლიდან ფონდის სახით საქართველოს თავდაცვის სამინისტროს ფარგლებში მოქმედებდა და სამხედრო მოსამსახურეებს ემსახურებოდა. აღნიშნული ინიციატივით გაფართოვდება პოტენციური დონორების წრე.

კომპანია „სილქნეტი“ პროექტის განვითარებისთვის ყოველწლიურად 100 000 ლარს გაიღებს და ფონდის მხარდამჭერთა ზრდაზე იზრუნებს. ამ ეტაპზე ფონდის დაფინანსებაში მონაწილეობის სურვილი უკვე გამოთქვეს „საქართველოს ბიზნეს ასოციაციამ“, კომპანიამ „ჯი დი ალკომ“ და სავარჯიშო დარბაზმა "წრემ".