სამთო მომზადების ზაფხულის საბაზისო კურსის დახურვა
„პარტნიორობა მშვიდობისათვის პროგრამის“ (PFP) ფარგლებში ჩატარებული სამთო მომზადების ზაფხულის საბაზისო კურსი დასრულდა. კურსის დახურვის ცერემონია პოლკოვნიკ ბესიკ ქუთათელაძის სახელობის საჩხერის სამთო მომზადების სკოლის სამწყობრო მოედანზე გაიმართა. სამხედრო მოსამსახურეებს სწავლების წარმატებით დასრულება წვრთნებისა და სამხედრო განათლების სარდალმა, პოლკოვნიკმა გრიგოლ ჭელიძემ და სკოლის მეთაურმა, მაიორმა მალხაზ გოლეთიანმა მიულოცეს. მათი განცხადებით, მსგავსი სწავლებები ქვეყნებს შორის ურთიერთობის გაღრმავებას ხელს უწყობს. მოგვიანებით კურსდამთავრებულებს სერტიფიკატები და სამკერდე ნიშნები გადაეცათ.
სამთო მომზადების ზაფხულის საბაზისო კურსი სამი კვირის განმავლობაში საჩხერესა და ჭიათურაში, სასწავლო უბნებზე მიმდინარეობდა მასში ნატოს წევრი და პარტნიორი 9 ქვეყნის 33 სამხედრო მოსამსახურე მონაწილეობდა. სწავლების განმავლობაში სამხედრო მოსამსახურეებმა სამთო ტექნიკური მომზადება გაიარეს და სხვადასხვა სახის სამთო უნარები განავითარეს. საჩხერის სამთო მომზადების სკოლის ინსტრუქტორების დახმარებით, მსმენელები სამთო აღჭურვილობის მოხმარების წესებსა და ტექნიკურ მონაცემებს გაეცნენ. კურსის მონაწილეებმა მთიან რელიეფზე უსაფრთხოების წესების გათვალისწინებით გადაადგილების, კლდეზე ცოცვის, კლდიდან დაშვების, მდინარისა და დაბრკოლებათა ზოლის გადალახვის სავარჯიშოები შეასრულეს. კურსის ფარგლებში სამხედრო მოსამსახურეებმა დაშავებულისთვის პირველადი სამედიცინო დახმარების აღმოჩენის, კოლექტიური გადარჩენისა და ევაკუაციის ორგანიზების წესებიც შეისწავლეს.
შემდეგ ეტაპზე მსმენელები სამთო მომზადების ზაფხულის შუალედურ კურსს გაივლიან.