„ნატო-საქართველოს არსებითი პაკეტი 2018 კონფერენციის“ (SNGP) მონაწილეებმა სამუშაო შეხვედრები სინდიკატებში გააგრძელეს. დღეს ხუთ სამუშაო ჯგუფად დაყოფილი 170-მდე უცხოელი ექსპერტი ქართველ კოლეგებთან, თავდაცვის სამინისტროსა და სხვა სამთავრობო უწყებების წარმომადგენლებთან ერთად, ნატო-საქართველოს არსებითი პაკეტის განხორციელების პროცესზე, პაკეტით გათვალისწინებულ ინიციატივებზე, გაწეულ სამუშაოსა და მიღებულ შედეგებზე მსჯელობდნენ.
სინდიკატების სამუშაო შეხვედრებზე ისეთი მნიშვნელოვანი და აქტუალური საკითხები განიხილეს, როგორებიც არის საქართველოს სტრატეგიული და ოპერატიული პროგრამების ურთიერთთავსებადობა როგორც სამთავრობო უწყებებთან, ასევე, ნატოს წევრ ქვეყნებთან და პარტნიორებთან; ტოტალური თავდაცვის კონცეფცია; ადამიანური, ორგანიზაციული, ფინანსური, ინფრასტრუქტურული და საგანმანათლებლო რესურსები.
სამუშაო შეხვედრები ნატო-საქართველოს არსებითი პაკეტით გათვალისწინებული პრიორიტეტების სინქრონიზაციას, სტრატეგიულ მიმართულებებზე საერთო მიდგომების ჩამოყალიბებას, საერთაშორისო მხარდაჭერის კონსოლიდაციას შეუწყობს ხელს.
„ნატო-საქართველოს არსებითი პაკეტი 2018 კონფერენცია“ ჩრდილოატლანტიკური ალიანსის, საქართველოსა და ბულგარეთის საელჩოს მიერ ერთობლივად დაიგეგმა და საქართველოში პირველად იმართება. ის მიზნად ისახავს დემონსტრირებას, თუ როგორ შეუძლია SNGP-ის სტრუქტურას, ორგანიზაციასა და განხორციელების მექანიზმებს, გახდეს განმეორებითი მოდელი „თავდაცვისა და უსაფრთხოების აღმშენებლობის“ (DCB) ნატოს სხვა ინიციატივებში.