ნატოს სამხედრო პოლიციის პანელი საქართველოში
საქართველოს თავდაცვის სამინისტრომ ნატოს სამხედრო პოლიციის პანელს პირველად უმასპინძლა. ღონისძიების ოფიციალური გახსნის ცერემონია სასტუმრო „ქორთიარდ მერიოტში“ გაიმართა.
ხუთი დღის განმავლობაში, ჩრდილო-ატლანტიკური ალიანსის წევრი და პარტნიორი ქვეყნების სამხედრო პოლიციის სამოცამდე წარმომადგენელი, ნატოს სამხედრო პოლიციის პროცედურებსა და სამომავლო გეგმებზე მსჯელობდა.
პანელის ფარგლებში დაგეგმილი დისკუსიები ამ მიმართულებით, ნატოს და პარტნიორ სახელმწიფოებს შორის არსებული თანამშრომლობის კიდევ უფრო გაღრმავებასა და თავსებადობის ამაღლებას ემსახურებოდა.
სამხედრო პოლიციის პანელის საქართველოში გამართვა კიდევ ერთხელ უსვამს ხაზს ნატოსა და საქართველოს შორის არსებულ მჭიდრო თანამშრომლობას და ქვეყნის ევრო-ატლანტიკურ სტრუქტურებში გაწევრიანების მიმართ ალიანსის ურყევ მხარდაჭერას.