ჯორჯ ბუშის ინსტიტუტის წარმომადგენლების ვიზიტი გორის სამხედრო ჰოსპიტალში და წეროვანის სარეაბილიტაციო ცენტრში
„ქვეყნის სახეს დიდწილად ის ფაქტი განსაზღვრავს, თუ როგორ უვლის ის თავის ჯარისკაცებს მას შემდეგ, რაც ბრძოლა დასრულდება. ამ კუთხით საქართველოს ძალიან სწორი და პროგრესული გეზი აქვს აღებული. საქართველო არაჩვეულებრივად ზრუნავს არა მხოლოდ ჯარისკაცებზე, არამედ მათი ოჯახის წევრებზეც. ეს ჯარისკაცები იცავენ მშვიდობას, როგორც ქვეყნის შიგნით, ასევე გლობალური მასშტაბით. მათი რეაბილიტაციის პროცესის სწორად წარმართვა მნიშვნელოვანი და აუცილებელია“ - განაცხადა ჯორჯ ბუშის ინსტიტუტის წარმომადგენელმა, პოლკოვნიკმა მიგელ ჰაუმ წეროვანის სამხედრო მოსამსახურეთა რეაბილიტაციის ცენტრში სტუმრობისას.
ოფიციალური ვიზიტის ფარგლებში პოლკოვნიკმა მიგელ ჰაუმ და მეთიუ ამიდონმა საქართველოს თავდაცვის სამინისტროს წეროვანის სამხედრო მოსამსახურეთა რეაბილიტაციის ცენტრი და გორის სამხედრო ჰოსპიტალი დაათვალიერეს. ხელმძღვანელობამ ამერიკელ სტუმრებს დაწესებულების მუშაობის, სამედიცინო სერვისებისა და სამომავლო გეგმების შესახებ დეტალური ინფორმაცია პრეზენტაციის სახით მიაწოდა. შეხვედრებს თავდაცვის სამინისტროს სოციალურ საკითხთა და ფსიქოლოგიური მხარდაჭერის დეპარტამენტის უფროსი პაატა პატიაშვილიც დაესწრო.
პოლკოვნიკი მიგელ ჰაუ და მეთ ამიდონი წეროვანის რეაბილიტაციის ცენტრი მკურნალობის კურსზე მყოფ დაჭრილ და დაშავებულ სამხედრო მოსამსახურეებს შეხვდნენ და გაესაუბრნენ. პოლკოვნიკმა მიგელ ჰაუმ სამხედროებს სამშვიდობო მისიებში მონაწილეობისა და მსოფლიოს მასშტაბით უსაფრთხოებისა და სტაბილურობის დამყარების საქმეში შეტანილი წვლილისთვის მადლობა გადაუხადა და აღნიშნა, რომ ქართველი სამხედროების მსგავსად მსოფლიოს მასშტაბით ბევრი დაჭრილი და დაშავებული ჯარისკაცია, რომლებიც გამოჯანმრთელებას საჭიროებენ და ბრძოლის ველზე ერთად დგომის მსგავსად გამოჯანმრთელების გზაც ერთად უნდა გაიარონ.
ჯორჯ ბუშის ინსტიტუტის წარმომადგენლებმა საქართველოს თავდაცვის მინისტრის მოადგილესთან ზაალ კაპანაძესთან და გენერალური შტაბის უფროსის მოადგილესთან, ბრიგადის გენერალთან ზაზა ჩხაიძესთან შეხვედრები უკვე გამართეს. დელეგაციის ვიზიტის მიზანი ქართველი დაჭრილი და დაშავებული სამხედრო მოსამსახურეებისთვის, ასევე მათი ოჯახის წევრებისთვის პოსტ ტრავმულ პერიოდში დახმარება-რეაბილიტაციის პროგრამის განხორციელებაა.