ლევან იზორია: „რუმინეთი მხარს უჭერს საქართველოს ჩრდილოატლანტიკურ სივრცეში ინტეგრაციის პროცესს“
„წელს 10 წელი სრულდება, როდესაც ამ ქალაქში, ბუქარესტში ნატომ პრინციპულად გააჟღერა საქართველოს ალიანსში გაწევრიანების პოზიცია. რუმინეთი კვლავ რჩება ამ პოზიციის და გადაწყვეტილების ერთგული და მხარს უჭერს ჩვენი ქვეყნის ჩრდილოატლანტიკურ სივრცეში ინტეგრაციის პროცესს“ - ეს განცხადება საქართველოს თავდაცვის მინისტრმა ლევან იზორიამ რუმინეთის საგარეო საქმეთა მინისტრთან თეოდორ ვიორელ მელესკანუსთან შეხვედრის შემდეგ გააკეთა.
მხარეებმა საქართველოსა და რუმინეთს შორის არსებული ორმხრივი თანამშრომლობის საკითხები განიხილეს და მომავალში გაძლიერების მზადყოფნა გამოთქვეს. საუბარი შეეხო ევროკავშირის სადამკვირვებლო მისიაში რუმინელი დამკვირვებლების ჩართულობასა და საქართველოს ნატოში ინტეგრაციის პერსპექტივებს.
საქართველოს თავდაცვის მინისტრის ოფიციალური ვიზიტი რუმინეთში ანთიმოზ ივერიელის სამონასტრო კომპლექსში სტუმრობით დასრულდა. თავდაცვის სამინისტროს დელეგაციას მონასტერში რუმინეთის მართლმადიდებლური ეკლესიის უმაღლესი საბჭოს მდივანმა უმასპინძლა. ქართულმა დელეგაციამ მონასტერი დაათვალიერა, სადაც ნუსხური დამწერლობით შესრულებული სახარებაა დაცული. სახარება მონასტერს ვახტანგ მეექვსემ 1709 წელს გადასცა.