საპარლამენტო უმრავლესობის წევრის, ზაქარია ქუცნაშვილის განცხადებით, მცხეთის რაიონულმა სასამართლომ თიანეთის საარჩევნო ოლქთან დაკავშირებით ორი სარჩელი არ დააკმაყოფილა, რითაც ფაქტობრივად, ლელა ქიტესაშვილს გამარჯვების შედეგებს პარავენ.

პირველ არხთან საუბარში ქუცნაშვილმა სასამართლოს გადაწყვეტილება შეაფასა და აღნიშნა, რომ 19 უბნის მიხედვით, ქიტესაშვილმა მეჭიაურს 24 ხმით მოუგო, ხოლო მე-20 უბნის მიხედვით, მას ხუთი ყალბი ბილეტენი ჩაუდეს, დანარჩენი ხმებით უპირატესობა მოიპოვეს და საერთო ჯამში, მეჭიაურს გამარჯვებისთვის პლუს ერთი ხმა დაუსვეს.

„სასამართლო დავაში მხარეს არ წარმოვადგენ, არც მოსარჩელე ვარ და არც საოლქო საარჩევნო კომისია. არასამთავრობო ორგანიზაციამ ოთხი რაღაცის ბათილობას მოითხოვდა და პირველმა ინსტანციამ ორი მოთხოვნის ბათილობა დაუკმაყოფილა. დანარჩენი ორი არ დაუკმაყოფილა, რითაც ფაქტობრივად, ლელა ქიტესაშვილს გამარჯვების შედეგებს პარავენ, რადგან 19 უბნის მიხედვით, ქიტესაშვილმა მეჭიაურს 24 ხმით მოუგო, ხოლო მე-20 უბნის მიხედვით, ხუთი ხმა ყალბი ბიულეტენი ჩაუდეს, დანარჩენი ხმებით უპირატესობა მოიპოვეს და საერთო ჯამში, მეჭიაურს გამარჯვებისთვის პლუს ერთი ხმა დაუსვეს. პროცესუალური მხარე არ ვარ, ამიტომ არანაირი ბერკეტი არ მაქვს იმისა, რომ ვიმოქმედო, რადგან არც საოლქო საარჩევნო კომისიას წარმოვადგენ და არც არასამთავრობო ორგანიზაციას. მიმაჩნია, რომ როცა ოთხი რამის ბათილობა იყო მოთხოვნილი და პირველი ინსტანციის სასამართლომ ორი დაუკმაყოფილა, ქიტესაშვილს 19 უბნის მიხედვით, 24 ხმიან გამარჯვებას ართმევს, ხოლო მე-20 უბნის მიხედვით, ხუთ ხმიან გამარჯვებას“, - აცხადებს ქუცნაშვილი.

ქუცნაშვილი მის მიმართ თამაზ მეჭიაურის ბრალდებებსაც გამოეხმაურა.

„როგორ შეიძლება, ზაქარია ქუცნაშვილი „ქართული ოცნების“ გამარჯვებაში არ იყოს დაინტერესებული და დაინტერესებული „ნაციონალურ მოძრაობასთან“ შეკრული ადამიანების გამარჯვებაში იყოს? გაყალბებაში რომ მადანაშაულებს, საოლქო საარჩევნო კომისიის წევრი ვარ, მოსამართლე ვარ? გაყალბების რა მექანიზმი მაქვს? მეჭიაური ამბობს, ხმების გადათვლა არასწორად მოხდაო? - „საარჩევნო კოდექსის“ მეოცე მუხლის თანახმად, საოლქო კომისიას შეუძლია, გადაწყვეტილება მიიღოს, გინდათ, საჩივრის და გინდათ, საკუთარი ინიციატივით ბიულეტინების გადათვლის შესახებ. საოლქო საარჩევნო კომისია შედგება ბევრი წევრისგან და არა ერთი წევრისგან. ამ ბევრმა წევრმა ხმების გადათვლის თაობაზე გადაწყვეტილება 2/3-ით მიიღო. ერთი ადამიანი ვერც თავმჯდომარე, ვერ მდივანი და ვერც კომისიის ნებისმიერი წევრი ამას საკუთარი ინიციატივით ვერ გააკეთებდა. ეს გადაწყვეტილება მიღებული ოპოზიციური წევრების ხელის აწევით იქნა. მათ შორის, „ნაციონალური მოძრაობის“, ბურჯანაძის პარტიის და ამ პროცედურებს თამაზ მეჭიაურის წარმომადგენელი თამარ დათუაშვილიც ესწრებოდა. ერთი ადამიანი ამ გადაწყვეტილების მიღებას როგორ მოახერხებდა?“, - განაცხადა დეპუტატმა.

რაც შეეხება კითხვას იყო თუ არა საოლქო საარჩევნო კომისიის წევრი ქუცნაშვილის ბიძაშვილი დეპუტატმა ინფორმაცია არც უარყო და არც დაადასტურა.

„რა მონაწილე იყო, რა სისულელეს მეკითხებით? თამაზ მეჭიაურის გამო, კომისიის წევრობაზე უარი ეთქვა? იქ კომისიის წევრი 13 კაცია - ბიძაშვილებიც, მეზობლებიც, თიანეთელებიც და მთიულებიც, იქ უამრავი ადამიანია, მათ შორის თამაზ მეჭიაურის“, - დასძინა ქუცნაშვილმა.

მცხეთის რაიონულმა სასამართლომ თიანეთის მე-19 საოლქო საარჩევნო კომისიის გადაწყვეტილება გააუქმა, რომლის მიხედვითაც, გაბათილებული ბიულეტენები ხელახლა გადაითვალა. შესაბამისად, პირვანდელი მდგომარეობა ძალაში დარჩა, რომლის მიხედვითაც, თამაზ მეჭიაური თიანეთში არჩევნებს ერთი ხმით იგებს.