"საკაბელო ტელევიზიების კავშირი" მაუწყებლების ტრანზიტის უფასოდ, ანაზღაურების მიღების გარეშე განხორციელების უფლების დაბრუნებას ითხოვს. პარლამენტის პრესსამსახურის ინფორმაციით, ეს საკითხი დარგობრივი ეკონომიკის დღევანდე სხდომაზე დაისვა.
პრესსამსახურის ცნობით, კომიტეტის სხდომაზე იმსჯელეს საქართველოს საკაბელო ტელევიზიების კავშირის მიერ წარმოდგენილი საკანონმდებლო წინადადებაზე „მაუწყებლობის შესახებ“ საქართველოს კანონში ცვლილების შეტანის თაობაზე“. საკანონმდებლო წინადადება სხდომაზე დამსწრე საზოგადოებას საქართველოს საკაბელო ტელევიზიების კავშირის აღმასრულებელმა დირექტორმა თეონა ბერუაშვილმა გააცნო.
საკაბელო ტელევიზიების კავშირი მაუწყებლების ტრანზიტის უფასოდ, ანაზღაურების მიღების გარეშე განხორციელების უფლების დაბრუნებას ითხოვს, რის შესახებაც პარლამენტს შესაბამისი საკანონმდებლო წინადადებით მიმართა.
როგორც საკაბელო ტელევიზიების წარმომადგენლები განმარტავენ, 2012 წელს შექმნილი ვითარებიდან გამომდინარე, საარჩევნო კანონმდებლობაში ე. წ. მასთ ქერის და მასთ ოფერის პრინციპი შევიდა, რაც, ერთი მხრივ, ოპერატორებს ავალდებულებდა, რომ საერთო მაუწყებლები შეთავაზებულ ყველა პაკეტში განეთავსებინათ, მეორე მხრივ კი, მაუწყებლობის ტრანზიტზე ავტორიზებულ პირს შეეძლო უფასოდ, მაუწყებლის ნებართვის გარეშე ასეთი მაუწყებლობის ტრანზიტი განეხორციელებინა.
როგორც პრესამსახურის ინფორმაციაშია აღნიშნული, 2013 წელს კი „მაუწყებლობის შესახებ კანონში“ განხორციელდა დამატება, რაც მხოლოდ სავალდებულო ტრანზიტის ცნებას ითვალისწინებს და გულისხმობს, რომ საერთო მაუწყებელს უფლება აქვს, მოთხოვოს მაუწყებლობის ტრანზიტზე ავტორიზებულ პირს, განათავსოს ტელეარხი მომხმარებლისთვის შეთავაზებულ ყველა პაკეტში, ოპერატორი კი ვალდებულია, მისი მოთხოვნა შეასრულოს, მაგრამ თუ ოპერატორს სურს ასეთი არხის ქსელში განთავსება, მას აუცილებლად სჭირდება ნებართვა თავად მაუწყებლისგან, რაც შესაძლოა ფასიანი აღმოჩნდეს. ამ დღეებში ასეც მოხდა, რამდენიმე მაუწყებელმა ოპერატორებისგან ფასიანი ტრანზიტი მოითხოვა, რაც ტრანზიტორი კომპანიების წარმომადგენლებს უსამართლობად მიაჩნიათ.
საკანონმდებლო წინადადების ავტორები მიიჩნევენ, რომ საჭიროა საკანონმდებლო ცვლილებების განხორციელება და სავალდებულო ტრანზიტის პირობების გადახედვა, რათა თანასწორ პირობებში აღმოჩნდნენ მაუწყებლები და მაუწყებლობის ტრანზიტზე ავტორიზებული პირები.
სხდომაზე ყველა მხარის პოზიცია მოისმინეს, მათ შორის, ეკონომიკისა და მდგრადი განვითარების სამინისტროსა და მარეგულირებელი კომისიის წარმომადგენლებისგან.
კომიტეტის წევრთა აზრით, პარლამენტში წარდგენილი საკითხი დამატებით შესწავლას და კონსულტაციების გამართვას საჭიროებს. როგორც კომიტეტის თავმჯდომარემ რომან კაკულიამ განაცხადა, საკითხი იმდენად მრავალმხრივია, რომ მასზე პოზიციის ჩამოყალიბება კომიტეტის ერთი სხდომის ფარგლებში ვერ მოხდება.
„აქ ლაპარაკი არ არის მხოლოდ ორ სტრუქტურას შორის დავაზე, გაცილებით სიღრმისეულია ეს საკითხი და ამას დამატებითი კონსულტაციები სჭირდება“, - განაცხადა რომან კაკულიამ.
დარგობრივი ეკონომიკისა და ეკონომიკური პოლიტიკის კომიტეტმა საკაბელო კომპანიების საკანონმდებლო წინადადებაზე გადაწყვეტილებების მიღება საკითხის დამატებით შესწავლის მიზნით გადადო.