სამი საკითხი შეგვიძლია პრიორიტეტად დავასახელოთ საქართველოსთვის, ეს არის: სამუშაო ადგილები, ჯანდაცვა და განათლება, - ამის შესახებ საქართველოში გაერო-ს წარმომადგენელმა ნილ სკოტმა საქართველოში მდგრადი განვითარების მიზნების პირველ სხდომაზე განაცხადა.
მისი თქმით, მთავრობის ღიაობის კუთხით უკვე დიდი სამუშაო ჩატარდა, პრიორიტეტულია სასამართლო სისტემაც.
"რაც მდგრადი განვითარების მიზნების პროექტს ახასიათებს, არის ის, რომ არ შეიძლება გამოვყოთ მხოლოდ ერთი ან ორი მიმართულება, მიზნების მისაღწევად სახელმწიფომ ყველა მიმართულებაზე უნდა იმუშაოს. გასათვალისწინებელია, რომ გარემო აქ დიდ როლს თამაშობს, თუ არ გაქვს კარგი გარემო, არ გაქვს კარგი ჯანმრთელობა, თუ არ გაქვს კარგი ჯანმრთელობა, ადამიანები ვერ მუშაობენ, თუ ვერ მუშაობენ, არ გაქვს ანაზღაურება და ასე შემდეგ. ჩვენ უნდა გავიაზროთ ეს, როგორც ერთი ამოცანა", - აღნიშნა ნილ სკოტმა.
გაერო საქართველოში მდგრადი განვითარების მიზნების პირველ სხდომას მართავს. მასში მთავრობის ადმინისტრაცია, საკანონმდებლო ორგანო, ადგილობრივი და საერთაშორისო ორგანიზაციები არიან ჩართული.