სლოვენიის საპრეზიდენტო არჩევნების პირველი ტური გამარჯვებულის გამოვლენის გარეშე დასრულდა. ვერც ერთმა კანდიდატმა 50-პროცენტიანი ბარიერის გადალახვა ვერ შეძლო. შედეგად, მეორე ტურში ერთმანეთს პირველ და მეორე ადგილზე გასული კანდიდატები დაუპირისპირდებიან.

პირველი ტურის მონაცემებით, ქვეყნის მოქმედმა პრეზიდენტმა, ბორუტ პაჰორიმ ამომრჩეველთა ხმების 47.07 პროცენტის მიღება შეძლო. მისი მთავარი მოწინააღმდეგე ქალაქ ქამნიკის მერი მარიან შარეცი იყო, რომელმაც ხმათა 24.97 პროცენტი მიიღო.

პრეზიდენტობისთვის სულ ცხრა კანდიდატი იბრძოდა. არჩევნების დასრულების შემდეგ, ტელეკომპანია „არ-ტი-ვიმ“ ეგზიტპოლების მონაცემები გამოაქვეყნა, რომლის შედეგადაც, გამარჯვება პირველივე ტურში ბორუტ პაჰორიმ მოიპოვა, თუმცა ეგზიტპოლების მონაცემები ცენტრალური საარჩევნო კომისიის შედეგებს არ დაემთხვა.

არჩევნების მეორე ტური 12 ნოემბერს გაიმართება. იმ შემთხვევაში, თუ მოქალაქეები კვლავ 53 წლის ბორუტ პაჰორის დაუჭერენ ხმას, ის პრეზიდენტის პოსტს მეორე ვადით, მომდევნო 5 წლის განმავლობაში დაიკავებს.