კიევში უმაღლეს რადასთან მიმდინარე მიტინგის ორგანიზატორები სამომავლო მოქმედებებთან დაკავშირებით, განცხადებას დღეს საღამოს თათბირის შემდეგ გააკეთებენ. ამის შესახებ ჟურნალისტებს დეპუტატმა იური ლევჩენკომ განაცხადა, რომელიც დემონსტრაციის ერთ-ერთი ორგანიზატორია.
უკრაინის დედაქალაქში საპროტესტო აქცია უკვე მესამე დღეა მიმდინარეობს. აქტივისტთა ნაწილს რადასთან კარვები აქვს გაშლილი.
როგორც დღეს უკრაინის გენერალურმა პროკურორმა იური ლუცენკომ განაცხადა, ხელისუფლება კიევში კარვების ძალის გამოყენებით აღებას არ აპირებს.
ამასთან, უკრაინის შინაგან საქმეთა სამინისტრომ დემონსტრანტებს მოუწოდა, დააბრუნონ სახელმწიფო ქონება, კერძოდ, ფარები, რომლებიც აქტივისტებმა სამართალდამცავებს 17 ოქტომბერს მომხდარი არეულობის დროს წაართვეს.
უმაღლეს რადასთან მიმდინარე აქციის მონაწილეთა მთავარი მოთხოვნებია დეპუტატების ხელშეუხებლობის გაუქმება, ანტიკორუფციული სასამართლოს შექმნა და საარჩევნო კანონმდებლობის შეცვლა.