Panama Papers-ის საგამოძიებო ჟურნალისტური ჯგუფის ერთ-ერთი წევრის, ჟურნალისტ დაფნე კარუანა გალისიას შვილი დედის მკვლელობაში მალტის ხელისუფლებას უმოქმედობას ადანაშაულებს. მეთიუ კარუანა გალისიამ მალტას მთავრობის მიმართ ბრალდებაზე სოციალურ ქსელ Facebook-ში საკუთარ გვერდზე დაწერა.
„დედაჩემი მოკლეს, რადგან იმ ქვეყნის ბინძურ საქმეებს იძიებდა, სადაც კანონის უზენაესობა არ არსებობს. ეს არის მაფიის მიერ მართული სახელმწიფო“, - წერს მეთიუ კარუანა გალისია.
53 წლის ჟურნალისტი სახლიდან გასვლიდან რამდენიმე წუთში საკუთარ ავტომობილში ააფეთქეს. პოლიციამ აფეთქების მიზეზი ამ დრომდე ვერ დაადგინა. გარდაცვალებამდე ორი კვირით ადრე ჟურნალისტმა სამართალდამცავ ორგანოს შეატყობინა, რომ მას მოკვლით ემუქრებიან.
დაფნე კარუანა გალისიამ ერთ-ერთ ბოლო პუბლიკაციაში მალტის პრემიერ-მინისტრ ჯოზეფ მუსკატს და მის ორ თანაშემწეს მალტის პასპორტების გაყიდვაში დასდო ბრალი. როგორც ის ამტკიცებდა, დოკუმენტების გაყიდვიდან მიღებული თანხა პრემიერისა და მისი თანაშემწეების ოფშორულ ანგარიშზე აზერბაიჯანის ხელისუფლებამ ჩარიცხა.