ესპანეთის სხვადასხვა ქალაქში ესპანეთის ერთიანობის მხარდამჭერი აქციები იმართება. ათიათასობით მოქალაქე ქუჩებში ესპანეთის სამეფოს სახელმწიფო დროშით ხელში კატალონიელებს მოუწოდებს, შეაჩერონ დამოუკიდებლობისთვის ბრძოლის პროცესი. ფართომასშტაბიანი აქცია მადრიდში გაიმართა. კატალონიის დამოუკიდებლობის მომხრეთა დემონსტრაცია იმართება ბარსელონაში.

პარალელურად, კატალონიის ავტონომიური მთავრობის მეთაურმა კარლეს პუიჩდემონმა შეხვედრა გამართა სხვადასხვა მსხვილი ორგანიზაციებისა და უნივერსიტეტების წარმომადგენლებთან. პუიჩდემონმა მათ მიმდინარე პოლიტიკურ კრიზისში ოფიციალურ მადრიდთან მედიატორობა სთხოვა. 10 ოქტომბერს კატალონიის პარლამენტში ცალმხრივად დამოუკიდებლობის გამოცხადების შესახებ კანონპროექტს კენჭი უნდა უყარონ, მიუხედავად იმისა, რომ აღნიშნული კანონპროექტი ესპანეთის საკონსტიტუციო სასამართლომ არაკანონიერად ცნო.

კატალონიის დამოუკიდებლობის ე.წ. რეფერენდუმი პირველ ოქტომბერს გაიმართა. კატალონიის მთავრობის ინფორმაციით, საყოველთაო გამოკითხვაში 2 მილიონ 26 ათასმა ადამიანმა მიიღო მონაწილეობა, მათგან 90% ესპანეთიდან გამოყოფის სასარგებლოდ გააკეთა არჩევანი.

წყარო: Reuters, El Pais