ევროპის საბჭოს მინისტრთა კომიტეტმა საქართველოდან წარდგენილი სტრასბურგის მოსამართლეობის კანდიდატებიდან რეკომენდაცია ლადო ჭანტურიას გაუწია, - ამის შესახებ საქართველოს იუსტიციის მინისტრმა, თეა წულუკიანმა განაცხადა.
როგორც წულუკიანმა აღნიშნა, ჭანტურიამ კომიტეტის სხდომაზე დამსწრე წევრების უმრავლესობის მხარდაჭერა მოიპოვა. მისივე თქმით, ამით მოსამართლეთა შერჩევის მეორე ეტაპი დასრულდა და წინაა მესამე ეტაპი.
„მიუხედავად ბევრი კრიტიკისა და სტრასბურგში საქართველოდან გაგზავნილი არაერთი კრიტიკული მოსაზრებისა, ფაქტი ფაქტად რჩება, რომ ქვეყნის შიგნით ჩატარებული პროცედურისადმი არასდროს დასმულა შეკითხვები. ფაქტია ის, რომ სხვა ქვეყნებისგან განსხვავებით, საქართველოში შიდა ეროვნული საკონკურსე კომისიის უნიკალური მოდელი შეიქმნა, რომელშიც მონაწილეობს არასამთავრობო სექტორი, ადვოკატები, მონაწილეობს ომბუდსმენი, რაც სხვა წევრ სახელმწიფოებში არ ხდება. ამიტომაც, პროცედურა ამჯერადაც იყო შესაბამისი კონვენციის მოთხოვნებთან, ასე ჩათვალა კომიტეტმა და ასევე, ფაქტია, რომ კომიტეტმა მოიწონა ქვეყნიდან გაგზავნილი სამპირიანი სია. დღეს უკვე შევიტყვეთ ის, რომ რეკომენდაცია გაეწია ლადო ჭანტურიას, რომელმაც კომიტეტში დამსწრე წევრების უმრავლესობა მოიპოვა და მოწონება დაიმსახურა. ამით მეორე ეტაპი დასრულდა და ვიწყებთ მესამე ეტაპს. მესამე ეტაპი, როგორც გვაცნობებენ, გაიმართება მომავალ კვირებში, სადაც უკვე საპარლამენტთაშორისო ასამბლეამ კენჭი უნდა უყაროს სამპირიან სიას და შეარჩიოს მათ შორის საუკეთესო კანდიდატი. მე იმედი მაქვს, რომ ასამბლეა კომიტეტის რეკომენდაციას გაითვალისწინებს“, - აღნიშნა იუსტიციის მინისტრმა.
ლადო ჭანტურიას გარდა, საქართველოდან სტრასბურგის მოსამართლეობის კანდიდატებად წარდგენილნი არიან ლალი ფაფიაშვილი და ოთარ სიჭინავა.