კატალონიის ავტონომიაში მიმდინარე დაძაბული პროცესების ფონზე, ესპანეთის მეფემ ფელიპე მეექვსემ ესპანელ ხალხს საგანგებო განცხადებით მიმართა. მან კატალონიის რეგიონული მთავრობა საკუთარი ქვეყნისა და კონსტიტუციის მიმართ ღალატში დაადანაშაულა და მოუწოდა, დაუყოვნებლივ აღადგინონ კონსტიტუციური წესრიგი კატალონიაში.
„კატალონიის მთავრობამ გამოავლინა ყოვლად დაუშვებელი უპასუხისმგებლობა და ყოველგვარი ერთგულების უგულებელყოფა“ - განაცხადა მეფემ.
მან ასევე მიმართა კატალონიელ ხალხს. ფელიპე მეექვსემ მოსახლეობას სიმშვიდისკენ მოუწოდა. მეფემ ესპანეთიდან გამოყოფის მოწინააღმდეგეები გაამხნევა და უთხრა, რომ მათ იცავს დემოკრატიული ქვეყნის კონსტიტუცია და არაფრის არ უნდა ეშინოდეთ.
„თქვენ მარტო არ ხართ, თქვენს გვერდითაა მთელი ქვეყანა და თქვენ გიცავთ კანონის უზენაესობა“ - აღნიშნა ფელიპე მეექვსემ.
დღეს ბარსელონაში მასშტაბური გაფიცვის შედეგად დაიხურა სხვადასხვა დაწესებულებები, სკოლები, გაჩერდა საზოგადოებრივი ტრანსპორტი. გაფიცვა კატალონიის მთავრობის მოწოდებებს მოჰყვა. ავტონომიური მთავრობის მეთაური კარლეს პუიჩდემონი აცხადებს, რომ უახლოეს მომავალში იგი მზადაა კატალონიის უნილატერალური - ცალმხრივი დამოუკიდებლობა გამოაცხადოს. პარლამენტის შენობასთან შეკრებილი ხალხი რეგიონულ მთავრობას სწორედ დამოუკიდებლობის გამოცხადებას მოუწოდებდა.
პარალელურად, მადრიდში ცენტრალური ხელისუფლება 155-ე მუხლის ამოქმედებას განიხილავს, რაც კატალონიისთვის ავტონომიის გაუქმებას გულისხმობს.