მთავარმა აუდიტორმა ირაკლი მექვაბიშვილმა აუდიტის სამსახურში საკადრო ცვლილებებთან დაკავშირებით განცხადება გააკეთა.
მექვაბიშვილის თქმით, აუდიტის სამსახურის უფროსს არავის გათავისუფლებაზე ხელი არ მოუწერია. მისივე განცხადებით, მთავარი აუდიტორის მოადგილეები უფლებამოსილებას გენერალური აუდიტორის წარდგინების დროს კარგავენ.
„გვქონდა გენერალური აუდიტორის მოადგილეების წარდგინება. კანონით მოადგილეები უფლებამოსილებას კარგავენ გენერალური აუდიტორის წარდგინების დროს. მთავარ აუდიტორს ხელი არ მოუწერია არავის გათავისუფლებაზე, ხელი მოვაწერე ახალი კადრების წარდგინებას.
წარვადგინეთ სამი მოადგილე, რომლებიც შეირჩნენ პროფესიონალიზმის ნიშნით. ეკატერინე ღაძაძე, დავით გოგიჩაიშვილი, ნოდარ ჯავახიშვილი“,-განაცხადა მთავარმა აუდიტორმა.
ამასთან, როგორც მექვაბიშვილმა აღნიშნა, ნოდარ ჯავახიშვილთან დაკავშირებით არასწორი აქცენტები გაკეთდა.
„მასთან დაკავშირებით არასწორი აქცენტები გაკეთდა. ის არის უაღრესად კვალიფიციური და გამოცდილი. ცალკე უნდა აღინიშნოს, რომ მისი ხელმძღვანელობით ჩვენ მივიღეთ ჩვენი ვალუტა ლარი და გაჯანსაღდა საბანკო სექტორი.
ეს ცვლილებები აუცილებელი იყო იმისთვის, რომ აუდიტის სამსახურის ინსტიტუციონალური გაძლიერება მოხდება. ყველა არასამთავრობოს, რომელსაც კითხვები აქვს საკადრო ცვლილებებთან დაკავშირებით, მზად ვარ ხვალიდანვე შევხვდე და ვესაუბრო“,- განაცხადა მექვაბიშვილმა.
გენერალურმა აუდიტორმა უარყო ინფორმაცია, რომ საკადრო ცვლილებები იუსტიციის მინისტრთან იყო შეთანხმებული.
„მე შევხვდი თეა წულუკიანს და გავიარეთ საკითხები მხოლოდ შემდგომი თანამშრომლობის კუთხით",- განაცხადა მექვაბიშვილმა.