კატალონიაში, უმსხვილესი პროფკავშირების ორგანიზებით, დღეს გაფიცვა იმართება. ამ ფორმით, აქციის მონაწილეები კატალონიის დამოუკიდებლობის შესახებ რეფერენდუმის მიმდინარეობისას პოლიციის ქმედებებს გააპროტესტებენ.

პროფკავშირული ორგანიზაციების მოწოდებას შეუერთდა საფეხბურთო კლუბი „ბარსელონა“, რომლის განცხადებით, დღეს კლუბი ღონისძიებებს და ვარჯიშებს არ გამართავს.

ამასთან, ესპანეთის უმსხვილესი პროფკავშირული გაერთიანებები CCOO და UGT გაფიცვაში არ მონაწილეობენ. ამის მიზეზად მათ კატალონიის მეთაურის, კარლეს პუიჩდემონის განცხადება დაასახელეს. როგორც ესპანეთის პროფკავშირების ერთობლივ განცხადებაშია ნათქვამი, პუიჩდემონის გამოსვლამ აჩვენა, რომ შექმნილი ვითარებიდან ერთადერთ გამოსავლად ის კატალონიის დამოუკიდებლობის გამოცხადებას ხედავს, მაშინ, როდესაც კონფლიქტის დასარეგულირებლად, აუცილებელია მადრიდთან მოლაპარაკებები.

2 ოქტომბერს, საღამოს კატალონიის ქალაქებში მრავალათასიანი საპროტესტო აქციები გაიმართა. ბარსელონაში აქციაზე 15 000 ადამიანი მონაწილეობდა. დემონსტრანტები რეფერენდუმის დროს პოლიციის მიერ ძალის გამოყენებას აპროტესტებდნენ.

კატალონიის დამოუკიდებლობის შესახებ ე.წ. რეფერენდუმი 1-ელ ოქტომბერს გაიმართა. ესპანეთის ხელისუფლებამ გამოკითხვა არაკონსტიტუციურად გამოაცხადა. ხმის მიცემის დღეს პოლიციამ რამდენიმე საარჩევნო უბანი დახურა, ამოიღო ურნები და ბიულეტენები. კატალონიის რამდენიმე ქალაქში საპროტესტო აქცია არეულობაში გადაიზარდა, რა დროსაც პოლიციამ რეზინის ტყვიები და ხელკეტები გამოიყენა. კატალონიის ავტონომიური რეგიონის მთავრობის მონაცემებით, 1-ელ ოქტომბერს 844 ადამიანი დაშავდა.