მოქალაქე თამარ თანდაშვილი საქართველოს მთავრობის წინააღმდეგ - საკონსტიტუციო სასამართლოს მეორე კოლეგიამ დღეს ამ სახელწოდების საქმის არსებითი განხილვა დაიწყო.
მოქალაქე მიიჩნევს, რომ კონსტიტუციასთან წინააღმდეგობაში მოდის საქართველოს მთავრობის 2010 წლის დადგენილება ,,ქვეყანაში სიღატაკის დონის შემცირებისა და მოსახლეობის სოციალური დაცვის სრულყოფის ღონისძიებათა შესახებ". კონკრეტულად კი დადგენილების ის ნაწილი, რომლის მიხედვით პირი ვერ დარეგისტრირდება სოციალურად დაუცველი ოჯახების მონაცემთა ერთიან ბაზაში და ვერ ისარგებლებს სოციალური შემწეობით, თუ იგი უკანონოდ იმყოფება სახელმწიფო საკუთრებაში არსებულ ფართში.
ამასთან, მოსარჩელის განცხადებით, სახელმწიფო საკუთრებაში უკანონოდ მცხოვრები ის პირები, ვინც სოციალურად დაუცველთა ბაზაში უკვე დარეგისტრირებულნი იყვნენ სადავო ნორმის ამოქმედებამდე, სარგებლობენ სოციალური შეღავათებით, რაც პირველ რიგში ეწინააღმდეგება კონსტიტუციით გარანტირებულ თანასწორობის უფლებას. მოსარჩელის ინტერესებს ადამიანის უფლებათა მონიტორინგისა და სწავლების ცენტრი იცავს.