საქართველოს ნაკრების შემტევი თორნიკე ოქრიაშვილი რუსეთის პრემიერლიგის მე-12 ტურის მატჩის დროს დაშავდა - მისი კლუბი „კრასნოდარი“ გასვლაზე ტულის "არსენალთან" ანგარიშით 0:1 დამარცხდა.

ქართველი შემტევი „კრასნოდარის“ რიგებში 70-ე წუთზე გამოჩნდა, მაგრამ 10 წუთში მუხლი დაიზიანა და მოედანი ისე დატოვა, თამაში ვერ დაასრულა.

"კრასნოდარის" მანამდე შარლ კაბორე გაუგდეს, სამივე შეცვლის უფლება კლუბს უკვე გამოყენებული ჰქონდა და მატჩი 9 ფეხბურთელით დაასრულა.

ჯერ უცნობია, რამდენად სერიოზულია ოქრიაშვილის მუხლის ტრავმა და დაეხმარება თუ არა საქართველოს ნაკრებს უელსისა (6 ოქტომბერს) და სერბეთის (9 ოქტომბერს) წინააღმდეგ ჩასატარებელ მატჩებში.

ასევე უცნობია, შეძლებს თუ არა სანაკრებო თამაშში მონაწილეობას მოსკოვის „სპარტაკის“ ნახევარმცველი ჯანო ანანიძე - მას წინა ტურში ტრავმა ისევ გაუმწვავდა და არც „ურალთან“ დღეს ჩასატარებელი შეხვედრის წინ უვარჯიშია.