წინასაარჩევნო დარღვევებზე და გარემოზე NDI-ის წარმომადგენლებს ინფორმაცია დღეს “ერთობა ახალი საქართველოს” წევრებმა მიაწოდეს. სადამკვირვებლო მისიის წარმომადგენლებთან საუბრისას გიორგი ვაშაძემ რამდენიმე საკითხი გამოყო, მათ შორისაა ადმინისტრაციული რესურსის გამოყენება, პარტიული კოორდინატორების ხელფასებისთვის არალეგალური ფულის გამოყოფა, საარჩევნო სისტემის და კომისიების პრობლემა, პარტიული პლაკატებს გამიზნული დაზიანება და პარტიის მხრიდან ბათუმის მერობის კანდიდატისთვის შექმნილი პრობლემები.
„ადმინისტრაციული რესურსის გამოყენებაში ვგულისხმობთ სკოლის მასწავლებლებისა და ბაღის მასწავლებლების იძულებას, რომ დაესწრონ ხელისუფდლების კანდიდატის შეხვედრებს არა მხოლოდ თბილისში, არამედ რეგიონებშიც არის იგივე პრეცედენტები. გარდა ამისა, მერიაში არსებული ბიუჯეტის გამოყენება კონკრეტული დაფინანსებისთვის, სოციალურად დაუცველი ადამიანებისთვის, თუმცა ახლა თანხის გამოყოფა ხდება აბსოლუტურად ყველასთვის, ფაქტობრივად ბიუჯეტის ფულს აძლევენ ამომრჩეველს და ამით ყიდულობენ მათ“,- აღნიშნავს „ერთობა ახალი საქართველოს“ ლიდერი.
NDI-ის საერთაშორისო სადამკვირვებლო მისიამ პოლიტიკურ პარტიებთან შეხვედრა აგვისტოს მიწურულს დაიწყო. ამ ხნის განმავლობაში მონიტორინგის მისიის წარმომადგენლებმა არასამთავრობო ორგანიზაციებთან და პოლიტიკურ პარტიებთან ასობით შეხვედრა გამართეს, რის შესახებაც ანგარიშს ორგანიზაცია უახლოეს კვირაში გეგმავს. შემდეგი ანგარიში კი არჩევნების შემდეგ გამოქვეყნდება.