რესპუბლიკელი სენატორების ნაწილი მიიჩნევს, რომ დონალდ ტრამპის მიერ ინიცირებული გრაჰამ-კასიდის სახელწოდებით ცნობილი ჯანდაცვის კანონპროექტი სენატში ვეღარ დამტკიცდება. მიზეზი რესპუბლიკურ პარტიაში არსებული აზრთასხვაობაა, რის გამოც კენჭისყრის დროს აღნიშნული კანონპროექტი საკმარის ხმებს ვერ მოაგროვებს.

რესპუბლიკელმა სენატორმა სიუზან კოლინსმა კენჭისყრის უშედეგოდ დასრულების შემდეგ, მედიას განუცხადა, რომ კანონპროექტს, რომლის ფარგლებშიც Obama Care-ის ჯანდაცვის პროგრამა ახალი პროგრამით უნდა ჩანაცვლდეს, საკმარისი მხარდამჭერები არ ჰყავს.

„მიუხედავად პრეზიდენტის თხოვნისა, მხარი დავუჭიროთ ჯანდაცვის ახალ კანონპროექტს, მე ვერ შევძლებ ამას, რადგან ამ კანონპროექტს ძალიან ბევრი ხარვეზი აქვს“, - განაცხადა კოლინსმა.

აღნიშნული კანონპროექტის ფარგლებში, სახელმწიფო დაზღვევის მისაღებად ახალი კრიტერიუმები შემუშავდება, რის შედეგადაც არსებობს საფრთხე, რომ სულ მცირე 23 მილიონი ადამიანი ჯანდაცვის გარეშე დარჩება.

ჯანდაცვის ახალი პროგრამა სწორედ დაბალშემოსავლიან მოქალაქეებს შეეხება, ძირითადად მათ, ვისი წლიური შემოსავალიც 25-26 ათას აშშ დოლარს არ აღემატება.