მიმდინარე წლის 7 თვეში, საერთო სასამართლოებში მოსმენების ნებართვაზე საგამოძიებო ორგანოებიდან 265 შუამდგომლობა შევიდა.

პირველმა არხმა მონაცემები უზენაესი სასამართლოდან გამოითხოვა.

მიღებული ინფორმაციის მიხედვით, 265 შუამდგომლობიდან მოსმენების ნებართვის 239 შუამდგომლობა სრულად დაკმაყოფილდა, ნაწილობრივ დაკმაყოფილდა - 16, ხოლო 10 შემთხვევაში საგამოძიებო ორგანოზე მოსმენების ნებართვა არ გაიცა.

უზენაესი სასამართლოდან მიღებული ინფორმაცია 2017 წლის პირველი იანვრიდან 31 ივლისის ჩათვლით პერიოდს ეხება. საუბარია სატელეფონო საუბრის ფარულ მოსმენასთან დაკავშირებულ შუამდგომლობებზე, რომლითაც საგამოძიებო უწყებებმა საერთო სასამართლოებს მიმართეს.

მიყურადების შესახებ ყველაზე მეტი შუამდგომლობა თბილისში დაკმაყოფილდა.

უზენაესი სასამართლოდან მიღებული ინფორმაციის მიხედვით, თბილისში, საგამოძიებო ორგანოებმა მოსმენაზე ნებართვა სასამართლოს 197-ჯერ სთხოვეს. სასამართლომ კი, თბილისში 197 შუამდგომლობიდან 182 სრულად დააკმაყოფილა, 12 - ნაწილობრივ, ხოლო 3 შემთხვევაში შუამდგომლობა არ დაკმაყოფილდა.

მეორე ადგილზეა ქუთაისი, სადაც გამოძიებამ 25 პირის მოსმენის შუამდგომლობით მიმართა სასამართლოს, 25-დან 23 სრულად დაკმაყოფილდა, 2 კი - ნაწილობრივ.

მესამე ადგილზეა ბათუმი, სადაც 11 შუამდგომლობიდან 10-ის შემთხვევაში სასამართლომ გამოძიებას სხვადასხვა პირების მოსმენის ნებართვა მისცა.

გარდა ამისა, უზენაესი სასამართლოს ინფორმაციით, სატელეფონო საუბრის ფარული მიყურადებისა და ჩაწერის ვადის გაგრძელების თაობაზე საქალაქო/რაიონული სასამართლოების მიერ განხილულია 86 შუამდგომლობა, მათ შორის დაკმაყოფილდა 78, ნაწილობრივ დაკმაყოფილდა 8.