დონალდ ტრამპმა ჩრდილოეთ კორეის საგარეო საქმეთა მინისტრის კრიტიკას უპასუხა. მიკრობლოგ „ტვიტერში“ აშშ-ის პრეზიდენტმა ჩრდილოეთ კორეის ლიდერ კიმ ჩენ ინს კიდევ ერთხელ უწოდა „ადამიანი-რაკეტა“.

„ახლახანს ვუსმინე ჩრდილოეთ კორეის საგარეო საქმეთა მინისტრის გამოსვლას გაერო-ში. თუ ის იმეორებს პატარა ადამიანი-რაკეტის აზრებს, მაშინ მათ დიდი დრო არ უწერიათ“, - წერს დონალდ ტრამპი.

შეგახსენებთ, რომ გაერო-ს გენერალურ ასამბლეაზე გამოსვლისას ჩრდილოეთ კორეის საგარეო საქმეთა მინისტრმა აშშ-ის პრეზიდენტს „ფსიქიკური პრობლემების მქონე, განდიდების მანიით შეპყრობილი ადამიანი“ უწოდა, რომელსაც ბირთვული იარაღი არ უნდა ანდო.

მანამდე აშშ-ის პრეზიდენტი გაერო-ს ტრიბუნიდან ჩრდილოეთ კორეას განადგურებით დაემუქრა.