ევროპის საკალათბურთო ჩემპიონატი დასასრულს უახლოვდება. დღეს მეორე ფინალისტი გუნდი გამოვლინდა. სერბეთის ნაკრებმა რუსეთი ანგარიშით 87-79 დაამარცხა. სერბები მთელი შეხვედრის განმავლობაში ლიდერობდნენ, მეტოქემ მხოლოდ ერთხელ შესძლო 1 ქულით დაწინაურება. სერბეთის სხვაობამ კი რამდენჯერმე 16 ქულასაც მიაღწია.

ბოლო მეოთხედის შუაში, რუსებმა კიდევ ერთხელ გაიბრძოლეს და ორ ქულამდეც მიუახლოვდნენ მეტოქეს, თუმცა ალესანდრე ჯორჯევიჩის გუნდს საკვანძო მომენტებში ბოგდან ბოგდანოვიჩმა ულიდერა, რომელმაც რამდენიმე მნიშვნელოვანი შეტევა დაასრულა ზუსტი ტყორცნით. საბოლოო ჯამში, ბოგდანოვიჩმა, 24 ქულა მოაგროვა. მასთან ერთად, გამარჯვებულთა შორის ბობან მარიანოვიჩი გამოირჩა. დეტროიტ „პისტონზის“ ცენტრმა აშკარად დაჩაგრა სამწამიანში ტიმოფეი მოზგოვი. მარიანოვიჩის მონაგარმა, 18 ქულა 6 მოხსნა და 4 შედეგიანი გადაცემა შეადგინა. რუსეთის ნაკრებში, როგორც მოსალოდნელი იყო, საუკეთესო შედეგი ალექსეი შვედს ჰქონდა, ტურნირის ბომბარდირმა 33 ქულა მოაგროვა.

„ევრობასკეტის“ ტიტულისთვის სერბეთი და სლოვენია იბრძოლებენ. მესამე ადგილისთვის შეხვედრაში კი, რუსეთი ესპანეთს დაუპირისპირდება.

შეხვედრები კვირას გაიმართება და ორივე მატჩის პირდაპირ ტრანსლაციას პირველი არხი შემოგთავაზებთ.