სახელმწიფო ელექტროსისტემამ ქედის რაიონის სოფელ კორომხეთში მაღალი ძაბვის გადამცემი ანძების დამონტაჟება გადაწყვიტა. ამისთვის მას ადგილობრივი გლეხების ეზოებში სამუშაო გზის გაყვანა და, შესაბამისად, ნაკვეთების გადათხრა დასჭირდა. მშენებლობა უკვე დაწყებული იყო, როდესაც, მოულოდნელად, ტერიტორიაზე მეწყერი ჩამოწვა. კომპანიამ მხოლოდ ამის მერე აღმოაჩინა, რომ ადგილი მეწყერსაშიში ზონაა და მაღალი ძაბვის ანძების დადგმა იქ დაუშვებელია. დაწყებული სამუშაოები მიატოვეს და ელექტროსადენებისთვის სხვა ადგილი შეარჩიეს. არც გლეხების დაზიანებულ ნაკვეთებს დაუბრუნეს ძველებური სახე და გადათხრილი ეზოებიც ასევე დატოვეს. სამშენებლო კომპანიას ამავე მოსახლეობის მიერ არჩეული დეპუტატი უშანგი ბერიძე ლობირებს. რატომ გაიმარჯვა სახელმწიფო ტენდერში სწორედ მისმა კომპანიამ?

სალომე ბეჟანიძე, ზურაბ სირბილაშვილი, დავით გელენიძე