ორჯერ შეცვლილი გეგმა და უკრაინაში მოხვედრის წარუმატებელი მცდელობები.
საქართველოს ყოფილი პრეზიდენტი უკრაინა-პოლონეთის საზღვრის შეგინის გამშვები პუნქტის ნეიტრალურ ზონაში რამდენიმე საათის განმავლობაში იმყოფებოდა.
მიხეილ სააკაშვილთან ერთად იყვნენ უკრაინის უმაღლესი რადას დეპუტატები მათ შორის იულია ტიმოშენკო.
მთელი დღის განმავლობაში ოფიციალური თბილისის მიერ ძებნილი ყოფილი პრეზიდენტი პოლონეთიდან უკრაინის მიმართულებით საზღვრის გადაკვეთას ცდილობდა.
პირველი გეგმა რომელიც ავტობუსით კრაკოვეცის გამშვები პუნქტისკენ გადაადგილებას გულისხმობდა, თავად მიხეილ სააკაშვილმა შეცვალა და უკრაინაში მოხვედრა მატარებლით გადაწყვიტა.
გეგმა ვერ შესრულდა. მატარებლებმა მოძრაობა შეწყვიტეს. როგორც მგზავრებს განუცხადეს, ამის მიზეზი ბორტზე იმ მგზავრის არსებობა გახდა, რომელსაც საზღვრის გადაკვეთის უფლება არ ჰქონდა.
რამდენიმესაათიანი ლოდინის შემდეგ, მიხეილ სააკაშვილი მხარდამჭერებთან ერთად კვლავ ავტობუსით გაემგზავრა საზღვრისკენ, მაგრამ უკრაინელ მესაზღვრეებს უსაფრთხოების ზომებიდან გამომდინარე შეგინის გამშვები პუნქტი დაკეტილი ჰქონდათ.
მოამბის გადამღები ჯგუფი მთელი დღის განმავლობაში ცდილობდა პოლონეთში განვითარებული მოვლენები გააშუქებინა, თუმცა პირველი არხის კამერა მიხელ სააკაშვილისთვის და მისი მხარდამჭერებისთვის არასასურველი აღმოჩნდა. გურამ როგავას ორჯერ შეუშალეს ხელი პროფესიულ საქმიანობაში და პრორუსულიც უწოდეს. ჩვენი ჟურნალისტს არ მისცეს უფლება, გადაადგილებულიყო იმ ავტობუსით, რომელითაც ყოფილი პრეზიდენტი მგზავრობდა და თავად მიხეილ სააკაშვილმაც არ ისურვა მასთან საუბარი. მოგვიანებით, სააკაშვილმა საპირისპიროს დამტკიცება სცადა და გურამ როგავას თავად მიმართა, თუმცა ამის შემდეგაც ჩვენ ჟურნალისტს კვლავ უარი უთხრეს ავტობუსში ასვლაზე, სადაც მიხეილ სააკაშვილი იყო.
გურამ როგავა ახლა პოლონეთში იმყოფება. მას პირდაპირ ეთერში ვრთავთ.