ურთიერთბრალდებების ფონზე მიმდინარეობს გაერთიანებული პროფკავშირების თავმჯდომარეობისთვის წინასაარჩევნო პროცესი. დავით ოქიტაშვილის ადვოკატის თქმით, მისი დაცვის ქვეშ მყოფს დელეგატთა სიას არ აძლევენ.

საპასუხოს ამტკიცებენ გაერთიანებულ პროფკავშირებში. ორგანიზაციის იურისტის განმარტებით, დელეგატთა სია მხოლოდ სამანდატო კომისიას აქვს და მისი გამჟღავნება კანდიდატებისთვის მიზანშეწონილი არ არის, რადგან პირად მონაცემებს შეიცავს.

გაერთიანებული პროფკავშირების ადვოკატის ინფორმაციით, დელეგატთა სია არც ირაკლი პეტრიაშვილს აქვს.

რაც შეეხება შეხვედრებს, თავმჯდომარეობის კანდიდატებს დელეგატებთან შეხვედრის უფლება აქვთ, თუ ამას თავად დელეგატები დაეთანხმებიან. ამისთვის კი გაერთიანებული პროფკავშირების თავმჯდომარეობის კანდიდატებმა პროფკავშირების დარგებს უნდა მიმართონ.

რამდენიმე დღის წინ ცნობილი გახდა, რომ დარგების დიდი ნაწილი დავით ოქიტაშვილთან შეხვედრაზე უარს აცხადებს, თანხმობა მხოლოდ რამდენიმე დარგმა გამოთქვა.

გაერთიანებული პროფკავშირების თავმჯდომარეს 22 დარგის 225 დელეგატი 15-16 სექტემბერს აირჩევს. თავად დელეგატებს კი დარგების წარმომადგენლები ირჩევენ. თითოეულ დარგს რიცხოვნობის მიხედვით საკუთარი კვოტა აქვს.