მოლდოვის პრეზიდენტმა, იგორ დოდონმა ქვეყნის შეიარაღებულ ძალებს უკრაინაში დაგეგმილ ნატო-ს წვრთნებში მონაწილეობა აუკრძალა. ალიანსის სწავლება Rapid Trident უკრაინაში 7-23 სექტემბერს ჩატარდება.

„მიუღებელია მოლდოველი სამხედროების მონაწილეობა სამხედრო წვრთნაში ქვეყნის საზღვრებს გარეთ“, - დაწერა დოდონმა სოციალურ ქსელ „ფეისბუქში“.

იგორ დოდონმა პოსტს თან დაურთო მოლდოვის თავდაცვის მინისტრის მოვალეობის შემსრულებლის, გეორგე გალბურასა და თავდაცვისა და ნაციონალური უსაფრთხოების საკითხებში პრეზიდენტის მრჩევლის, უშიშროების საბჭოს მდივნის არტურ გუმენიუკის წერილები.

თავის წერილში თავდაცვის მინისტრის მოვალეობის შემსურლებელი იტყობინება უკრაინის ლვოვის ოლქში ნატო-ს წვრთნებში მონაწილეობის მისაღებად 57 სამხედროს გაგზავნის გეგმის შესახებ. როგორც გალბურა წერს, მოლდოველი ჯარისკაცები ამ სამხედრო მანევრებში 1996 წლიდან მონაწილეობენ.

საპასუხო წერილში პრეზიდენტის მრჩეველი არტურ გუმენიუკი თავდაცვის მინისტრს ატყობინებს, რომ პრეზიდენტმა ნატო-ს წვრთნებში მოლდოველი სამხედროების მონაწილეობის საკითხი არ დაამტკიცა.

„ამის გათვალისწინებით, გთხოვთ, მიიღოთ ზომები წვრთნაზე სამხედრო კონტინგენტის გაგზავნის მოსამზადებელი ღონისძიებების გასაუქმებლად და აცნობოთ ორგანიზატორებს იმის შესახებ, რომ მოლდოვის რესპუბლიკა აღნიშნულ სწავლებაში მონაწილეობას არ მიიღებს“, - წერს გუმენიუკი.