მინსკის ისტორიულ ცენტრში ქართული კულტურის რიგით მესამე ფესტივალი „თბილისობა 2017“ გაიმართა.

„თბილისობა 2017“ სპეციალურად შექმნილი დღისა და ღამის პროგრამებისგან შედგებოდა და სხვადასხვა ღონისძიებით იყო დატვირთული.

ფესტივალის ფარგლებში გაიმართა ქართული ეროვნული სამოსის და თბილისის ხედების გამოფენები, ჩატარდა ქართული ენის გაკვეთილები, ცეკვის და სამზარეულოს მასტერკლასები. დღესასწაულის ფარგლებში გაიმართა ქართული მოკლემეტრაჟიანი ფილმების და საქართველოს შესახებ ვიდეორგოლების ჩვენება.

ღამით გაიმართა თანამედროვე ქართველი დიზაინერების კოლექციების ჩვენება ქართული დიჯეების კომპოზიციების ფონზე. ასევე, ანსამბლის „ქართული ხმები“, ცეკვის ანსამბლის „მერანი“ და Tbilisi Big Band-ის სოლისტების მონაწილეობით გაიმართა კონცერტი, რომელმაც ბელარუსის საზოგადოების არნახული ინტერესი და მოწონება დაიმსახურა.

თბილისობის დღესასწაულის აღნიშვნა მინსკისთვის უკვე ტრადიციული გახდა. არსებული ინფორმაციით წელს ფესტივალს 55 ათასზე მეტი ადამიანი დაესწრო.