კალიფორნიაში სამართალდამცველებმა ტყის ხანძრის განზრახ გაჩენაში ეჭვმიტანილი ჯონ ბალენგერი დააკავეს. სასამართლო პროცესი დღეს გაიმართება. ბრალის დამტკიცების შემთხვევაში ბალენგერს 8 წლით თავისუფლების აღკვეთა ემუქრება.

კალიფორნიის ჩრდილოეთ ნაწილში ტყის ხანძარი რამდენიმე კვირაა მძვინვარებს. ცეცხლი, შესაძლოა, დასახლებულ პუნქტებზე გავრცელდეს.

შტატის გუბერნატორის გადაწყვეტილებით, მიმდებარე ტერიტორიიდან მოსახლეობის ევაკუაცია განხორციელდა. 500-მდე სახლი ტყის სიახლოვეს საშიშ ზონაშია მოქცეული, 30 საცხოვრებელი შენობა კი ხანძრის შედეგად განადგურებულია. სტიქიის გავრცელებას ჰაერის მაღალი ტემპერატურა და ქარი უწყობს ხელს.

ბოლო ორი წლის განმავლობაში, ამერიკის შეერთებულ შტატებში 2,5 მილიონი ჰექტარი ტყის მასივი ხანძრის შედეგად განადგურდა.