ლიბანური ტერორისტული გაერთიანების „ჰეზბოლას“ ლიდერი საიდ ჰასან ნასრალა სირიის პრეზიდენტს ბაშარ ალ ასადს დამასკოში შეხვდა. აღნიშნული აუდიენციის შესახებ ინფორმაცია თავად ნასრალამ ვიდეომიმართვით გაავრცელა.
მისი თქმით, საუბრის მთავარი თემა თვითგამოცხადებულ ისლამურ სახელმწიფოსთან შეთანხმების მიღწევა იყო. კერძოდ, ნასრალას განმარტებით, მან ასადს სთხოვა, სირიის ჯარისა და „ჰეზბოლას“ მიერ სირია-ლიბანის საზღვართან ალყაში მოქცეულ ჯიჰადისტებს გადაადგილების საშუალება მისცენ, რის სანაცვლოდაც ISIS ტყვედ ჩავარდნილ ლიბანელ ჯარისკაცებს გაათავისუფლებს.
აღნიშნული გადაწყვეტილება კრიტიკულად შეაფასა ერაყის მთავრობამ და ამერიკის შეერთებული შტატების მიერ ფორმირებულმა საერთაშორისო კოალიციამ, რომელიც 2014 წლიდან დაეშის წინააღმდეგ საჰაერო იერიშს ახორციელებს.
უკვე რამდენიმე თვეა, რაც სირიის ჩრდილო-დასავლეთით „ჰეზბოლას“ წევრები სირიის ჯართან ერთად თვითგამოცხადებული ისლამური სახელმწიფოს, იგივე დაეშის წინააღმდეგ იბრძვიან. ბრძოლაში ლიბანის ჯარიც მონაწილეობს, თუმცა ოფიციალური ბეირუთის განცხადებით, ლიბანის შეიარაღებულ ძალებს „ჰეზბოლასთან“ არავითარი კავშირი არ აქვთ.