თბილისის საკრებულოს ფრაქცია ნაციონალური მოძრაობა მაჟორიტარი ბიუროების ოფისების გაუქმებას მოითხოვს. აღნიშნულის შესახებ უმცირესობას უკვე მომზადებული აქვს დადგენილების პროექტი, რომლის შეტანას საკრებულოში დღეს გეგმავს.

ფრაქციის ინიციატივა მედიის წარმომადგენლებს ცოტა ხნის წინ მარიკა დათუკიშვილმა გააცნო. მისი თქმით, მაჟორიტარი ბიუროების ოფისებს, რომლისთვისაც წლიურად მილიონ-ნახევარი ლარი გამოიყოფა, თავად მაჟორიტარები ბოროტად იყენებენ, კერძოდ, ადამიანებს ნათესაური ნიშნით ასაქმებენ.

დათუკიშვილი დასახელებული თანხის თბილისელების კეთილდღეობისთვის მოხმარებასა და სოციალური მიმართულებით გადანაწილებას მოითხოვს.

ოპონენტების ინიციატივასთან დაკავშირებით კომენტარი საკრებულოს უმრავლესობაში ჯერ არ გაუკეთებიათ.