„ზედმეტად ვთვლი, თავი ვიმართლო, დარდიც არ მაქვს. სადაც უნდათ, იქ ჩაატარონ გამოძიება და ექსპერტიზა, რა სახისაც გინდა იყოს“, - ასე უპასუხა შს მინისტრმა გიორგი მღებრიშვილმა კითხვას, რომელიც რუსულ და უკრაინულ მედიაში გავრცელებულ აუდიოჩანაწერს ეხებოდა.
„მე ერთ რამეს გეტყვით - ფე-ეს-ბე-ს აგენტები და „ნაციონალური მოძრაობის“ წევრები ერთად უტევენ ხელისუფლებას. ეს არის აგორებული შავი პიარი, რომელიც ჩვენს შესასუსტებლად არის მიმართული“, - განაცხადა გიორგი მღებრიშვილმა.
ჟურნალისტის კითხვაზე, ჩაატარებენ თუ არა ქართველი სამართალდამცველები აღნიშნულ ჩანაწერზე გამოძიებას, მღებრიშვილმა განაცხადა: „რა გამოკვლევა უნდა ჩავატარო მე, რის საფუძველზე. რა შეიძლება დაერქვას ამ ყველაფერს თუ არა ორკესტრირებული შემოტევა“.
შს მინისტრმა აღნიშნა, რომ ამ თემაზე დამატებით კომენტარს აღარ გააკეთებს.
რუსი პრანკერების მტკიცებით, მათ საქართველოს შინაგან საქმეთა მინისტრს გიორგი მღებრიშვილს უკრაინელი კოლეგის არსენ ავაკოვის სახელით დაურეკეს. „ვოვანი“ და „ლექსუსი“ რუსულ მედიასთან საუბარში ყვებიან, თითქოს მღებრიშვილს მიხეილ სააკაშვილის ექსტრადირება შესთავაზეს. პასუხად მღებრიშვილმა საქართველოს ყოფილი პრეზიდენტი უცენზუროდ მოიხსენია და თქვა, რომ საქართველოში მიხეილ სააკაშვილი არ სჭირდებათ, დარჩეს სადაც არის, რადგან ქართულ მხარეს არ სურს მისი გმირად გადაქცევა. მისი თქმით, საქართველოში ვითარება სტაბილურია, სააკაშვილის დაბრუნება კი მღელვარებას გამოიწვევს. პრანკერები ინტერნეტში სატელეფონო საუბრის აუდიოჩანაწერსაც აქვეყნებენ. აუდიოჩანაწერში, პირი, რომელიც, მათივე მტკიცებით, მღებრიშვილია, ამბობს, რომ სააკაშვილის საკითხი პროკურორთან განიხილა, ასევე ის აღნიშნავს, რომ პრემიერი მიხეილ სააკაშვილის ექსტრადირების საკითხზე პრეზიდენტსაც (უკრაინის პრეზიდენტს) ესაუბრა და მკაფიოდ განაცხადა, რომ მიხეილ სააკაშვილის საქართველოში ექსტრადირება არ სურთ.
"ზოგადად, იმის დაშვებაც კი, რომ ორი ქვეყნის შს მინისტრები სახელმწიფოებრივად მნიშვნელოვან თემებს განიხილავენ არადაცული სატელეფონო კავშირის მეშვეობით, არასერიოზულია",- განაცხადეს ამ თემასთან დაკავშირებით საქართველოს შს სამინისტროს პრესსამსახურში.