1000-მდე სკოლაში ბავშვები ფეხბურთში უფასოდ ივარჯიშებენ, - ამის შესახებ ფეხბურთის ფედერაციის პრეზიდენტმა ლევან კობიაშვილმა სასტუმრო „ჰუალინგში“ საქართველოს ფეხბურთის ფედერაციის 27-ე ყრილობაზე განაცხადა.

კობიაშვილის თქმით, ბავშვთა ფეხბურთში ახალი პროექტის დაწყება იგეგმება.

„სექტემბრიდან ამოქმედდება პროგრამა, რომლის მიხედვითაც, მთელი ქვეყნის მასშტაბით, 1000-მდე სკოლაში პრიორიტეტული იქნება ფეხბურთი და დაწყებით კლასებში მოსწავლეებს საშუალება ექნებათ, უფასოდ ივარჯიშონ. ეს ფეხბურთის მასობრიობისთვის უმნიშნელოვანესი გადაწყვეტილებაა“, - აღნიშნა კობიაშვილმა.

ფეხბურთის ფედერაციის პრეზიდენტმა ბოლო ერთ წელიწადში განხორციელებულ პროექტებზე ისაუბრა და საქართველოში დასრულებული 19-წლამდელთა ევროპის ჩემპიონატი შეაფასა.

მისი თქმით, ფეხბურთის ფედერაციას არსებული ვალების განახევრება მოახერხა.

„ფეხბურთის ფედერაციის საშინაო და საგარეო ვალები 18 მილიონი იყო. ჩვენი მოსვლის შემდეგ ეს ციფრი განახევრდა. შევეცდებით, რომ უახლოეს პერიოდში ეს ვალები მაქსიმალურად შევამციროთ“, - ამბობს კობიაშვილი.

ყრილობას ფიფა-ს განვითარების პროგრამების კოორდინატორი ოლივერ იუნგი და უეფა-ს ეროვნული ასოციაციების დეპარტამენტის საერთაშორისო ურთიერთობების განყოფილების ხელმძღვანელი ევა პასკიე ესწრებოდნენ.