ამერიკული გამოცემა „ვაშინგტონ პოსტი“ აშშ-ის პრეზიდენტის დონალდ ტრამპის სატელეფონო საუბრების სტენოგრამას აქვეყნებს. ჩანაწერში დონალდ ტრამპი ავსტრალიისა და მექსიკის ლიდერებს უხეშად ელაპარაკება. „ვაშინგტონ პოსტის“ ცნობით, სატელეფონო საუბრები იანვარშია ჩაწერილი. დონალდ ტრამპი ცდილობს დაითანხმოს თავისი მექსიკელი კოლეგა, ენრიკე პენია ნიეტო, საზღვარზე კედლის მშენებლობის საფასურის გადახდაზე. კიდევ ერთ ჩანაწერში კი, თანხმობის შემთხვევაში, ნიეტოს მომავალ არჩევნებში გამარჯვებას პირდება.
იანვრის ბოლოს ორი ქვეყნის საზღვარზე კედლის მშენებლობის საკითხზე დავის გამო მექსიკის პრეზიდენტმა ვაშინგტონში ოფიციალური ვიზიტიც კი გააუქმა. მექსიკის საზღვარზე კედლის მშენებლობის დაწყებას აშშ-ის პრეზიდენტი 2017 წლის ნოემბერში გეგმავს.
მეორე ჩანაწერში, ავსტრალიის პრემიერთან საუბრისას, აშშ-ის პრეზიდენტი ვერ მალავს გაღიზიანებას ბარაკ ობამას მიერ ლტოლვილების მიღების შესახებ ხელმოწერილი შეთანხმების გამო. ავსტრალიასთან გაფორმებული დოკუმენტის მიხედვით, აშშ-მა თანხმობა განაცხადა ავსტრალიის კუნძულებიდან მიგრანტების მიღებაზე.