თბილისში, კახეთის გზატკეცილზე მდებარე შპს „შარავანდის“ ტერიტორიაზე გაჩენილი ხანძარი ლიკვიდირებულია, - ამის შესახებ ინფორმაციას შინაგან საქმეთა სამინისტრო ავრცელებს.

უწყების ცნობით, ცეცხლის ქრობის პროცესში 30-ზე მეტი სახანძრო-სამაშველო ტექნიკა და 150-ზე მეტი მეხანძრე-მაშველი მონაწილეობდა.

შემთხვევის შედეგად არავინ დაშავებულა.

შსს-ს ცნობით, მომხდარ ფაქტთან დაკავშირებით, თბილისის პოლიციის დეპარტამენტის ისანი-სამგორის სამმართველომ გამოძიება საქართველოს სსკ-ს 187-ე მუხლით დაიწყო, რაც ნივთის დაზიანებას ან განადგურებას გულისხმობს.

შეგახსენებთ, კახეთის გზატკეცილზე ხანძარი რამდენიმე საათის წინ გაჩნდა. დამწვარია 800 კვ.მ-მდე ფართობი. სტამბის ხელმძღვანელობა ხანძრის შეგნებულად გაჩენას გამორიცხავს და ცეცხლის გაჩენის სავარაუდო მიზეზად მოკლე ჩართვას ასახელებს.