საქართველოს შეიარაღებული ძალების I ქვეითი ბრიგადის გაძლიერებული ასეული ავღანეთიდან სამშობლოში დაბრუნდა. ჯარისკაცებს სამხედრო აეროდრომზე საქართველოს შეიარაღებული ძალების გენერალური შტაბის უფროსის პირველი მოადგილე, პოლკოვნიკი ნიკოლოზ ჯანჯღავა და I ქვეითი ბრიგადის მეთაური, პოლკოვნიკი როლანდ ძნელაძე დახვდნენ და სამშობლოში მშვიდობით, უდანაკარგოდ დაბრუნება მიულოცეს. მათ ქართველ მშვიდობისმყოფელებს მისიის შესრულებისთვის მადლობა გადაუხადეს და წარმატებები უსურვეს.
I ქვეითი ბრიგადის გაძლიერებული ასეული ავღანეთის ისლამურ რესპუბლიკაში „მტკიცე მხარდაჭერის“ მისიას მაზარ-ი-შარიფში, ბაზა „მარმალზე“ 7 თვის განმავლობაში ასრულებდა. გერმანული სარდლობის დაქვემდებარებაში მყოფი ქვედანაყოფის მთავარ ამოცანას, საჭიროების შემთხვევაში მოკავშირე და ადგილობრივი უსაფრთხოების ძალების მხარდაჭერა და სწრაფი რეაგირება წარმოადგენდა.
I ქვეითი ბრიგადის გაძლიერებული ასეული III ქვეითი ბრიგადის გაძლიერებულმა ასეულმა ჩაანაცვლა. უფლებამოსილების გადაბარების ცერემონიალი მაზარ-ი-შარიფში, გერმანულ სამხედრო ბაზა „მარმალზე“ გაიმართა.