მაიკ პენსის ვიზიტი ესტონეთში დასრულდა. როგორც აშშ-ის ვიცე პრეზიდენტი „ტვიტერზე“ წერს, „შემდეგი გაჩერება საქართველოა“.

ვიზიტის დასასრულს პენსმა მოლაპარაკებები გამართა ლატვიის, ლიტვისა და ესტონეთის ლიდერებთან. როგორც სიტყვით გამოსვლისას აშშ-ის ვიცე პრეზიდენტმა განაცხადა, ნატო ახლა კიდევ უფრო საჭიროა, ვიდრე ეს იყო მეოთხედი საუკუნის წინ, როდესაც კომუნიზმი დაეცა.

მან კიდევ ერთხელ გაამახვილა ყურადღება რუსეთისაგან მომავალ აგრესიასა და ბალტიის ლიდერებს მხარდაჭერას დაპირდა. როგორც ცნობილი ხდება, მოლაპარაკებების დროს მხარეებმა ბალტიისპირეთში აშშ-ის საჰაერო თავდაცვითი სისტემების განთავსების შესაძლებლობაც განიხილეს.

„ჩვენ ახლა ერთად ვდგავართ, რადგან ვიცით, რომ დღეს ნატო ძლიერი, ერთიანი და უფრო საჭიროა, ვიდრე ეს მეოთხედი საუკუნის წინ კომუნიზმის დაცემის შემდეგ იყო. არ არსებობს იმ საფრთხეზე უფრო მნიშვნელოვანი რამ, ვიდრე ის აგრესია, რომელიც თქვენი აღმოსავლეთ მეზობლისგან მოდის. დღეს რუსეთი ცდილობს შეცვალოს საერთაშორისოდ აღიარებული საზღვრები ძალის გამოყენებით, ძირი გამოუთხაროს სუვერენული სახელმწიფოების დემოკრატიას და ხელი შუწყოს ევროპის დაყოფას, დაუპირისპიროს ქვეყნები ერთმანეთს. პრეზიდენტ ტრამპის მეთაურობით, აშშ-ი ეწინააღმდეგება ძალის გამოყენებას, მუქარას, ზეწოლას ბალტიის სახელმწიფოებსა და ჩვენს ნებისმიერ მოკავშირეზე“, - განაცხადა მაიკ პენსმა.

აშშ-ის ვიცე-პრეზიდენტსა და მის მეუღლეს საქართველოში დაახლოებით 19:00 საათისთვის ელოდებიან.