სურსათის ეროვნულმა სააგენტომ უფასო სასადილოების შემოწმებისას გამოვლენილი შეუსაბამობების გამო, 5 საწარმოს პროცესი შეუჩერა და 2 დააჯარიმა. ამის შესახებ საზოგადოებრივს სურსათის ეროვნულ სააგენტოში განუცხადეს.

„ახალი საქართველოს“ ლიდერის გიორგი ვაშაძის განცხადებით, სასადილოები მას შემდეგ შეამოწმეს, რაც მათ უფასო სასადილოების კომპლექსური შემოწმება დაიწყეს.

„საგანგაშოა ფაქტი, რომელიც გამოვლინდა უფასო სასადილოებში. სურსათის ეროვნული სააგენტოს დასკვნით საკვები პროდუქტები, რომელიც უფასო სასადილოებში გამოიყენება, სიცოცხლისთვის სახიფათოა. ეს შემოწმება განხორციელდა მას შემდეგ, რაც ჩვენ უფასო სასადილოებზე დავიწყეთ კომპლექსური შემოწმებები და მონიტორინგი“,- განაცხადა გიორგი ვაშაძემ.

ბრალდებას სურსათის ეროვნული სააგენტოს წარმომადგენლებმა უპასუხეს. მათი განმარტებით, შემოწმება სახელმწიფო კონტროლის ფარგლებში მუდმივ რეჟიმში მიმდინარეობს. გარდა ამისა ყოველწლიურად ტარდება დოკუმენტური შემოწმება და ინსპექტირებაც.

„სურსათის ეროვნული სააგენტო ინტენსიურად ამოწმებს უფასო სასადილოების კვების ბლოკებს. შემოწმება სახელმწიფო კონტროლის პროგრამის ფარგლებში ყოველწლიურად ტარდება. წარმოდგენილი კომპანიებიდან რამდენიმე შარშანაც დაჯარიმდა სააგენტოს მიერ“, - განუცხადეს საზოგადოებრივს სურსათის ეროვნულ სააგენტოში.