მთავარ პროკურატურაში აფგან მუხტარლის მეუღლის გამოკითხვა დასრულდა. აზერბაიჯანელი ჟურნალისტის მეუღლე ლეილა მუსტაფაევა მთავარ პროკურატურაში ხუთი საათის განმავლობაში იკითხებოდა. მუსტაფაევამ გამომძიებელს მოუყვა, თუ რა ვითარებაში გაუჩინარდა მისი მეუღლე და ასევე, რა ინფორმაციები აქვს ამ საქმეზე.
მუსტაფაევამ და მისმა ადვოკატმა გამოძიებისგან მოითხოვეს, დაინტერესდეს პროკურატურა, როგორ მოხდა პასპორტის გარეშე აფგან მუხტარლის საზღვარზე გადაყვანა, ასევე რატომ არ მოხდა კონტროლი და დადგინდეს, ვინ არის ის ხუთი საეჭვო პიროვნება, რომელთა ფოტოებიც არსებობს საქმეში.
ამასთან, ლეილა მუსტაფავე აცხადებს, რომ გაუგებარია, რატომ არის წაშლილი სათვალთვალო კამერების ის ჩანაწერები, სადაც ასახული უნდა ყოფილიყო მუხტარლის გადაადგილება.
მისივე თქმით, ათ დღეში იქნება ცნობილი, რამდენად ობიექტურად და ეფექტურად მიმდინარეობს პროკურატურის მიერ მუხტარლის საქმეზე გამოძიება.
საქმეზე გამოძიება თავისულების უკანონოდ აღკვეთის მუხლით მიმდინარეობს. გამოძიებას შსს აწარმოებდა, თუმცა 20 ივლისის შემდეგ საქმე მთავარმა პროკურატურამ გადაიბარა.
მუსტაფაევა დღეს დამატებით გამოიკითხა. მას ამ საქმეზე ჩვენება აქვს მიცემული პოლიციის განყოფილებაში, როდესაც თავდაპირველად საქმეზე გამოძიება დაიწყო.