„ევროპული საქართველო“ „ქართველთა მარშის“ საქმიანობის შეჩერების მიზნით საზოგადოების ჯგუფებთან კონსულტაციების გამართვას გეგმავს, - ამის შესახებ ელენე ხოშტარიამ განაცხადა.
პარტიის ერთ-ერთი ლიდერი „ქართველთა მარშის“ წევრების მიერ სოციალურ ქსელში განთავსებულ განცხადებებს გამოეხმაურა. ელენე ხოშტარიას თქმით ფაშისტური და ჰომოფობიური განცხადებები უნდა დაიგმოს, ხოლო მოძალადეებმა პასუხი აგონ.
როგორც ხოშტარიამ აღნიშნა, „ქართველთა მარშის“ წევრები სოციალურ ქსელში კონკრეტული მოქალაქეების მიმართ სექსუალური ძალადობის შემცველ განცხადებებს აკეთებდნენ.
„ევროპული საქართველოს“ ერთ-ერთი ლიდერის მტკიცებით, „ქართველთა მარში“ და მსგავსი ჯგუფები ხელისუფლების მიერ არის წახალისებული და მთავრობა სათანადოდ არ რეაგირებს სისხლის სამართლის დანაშაულის შემცველ ფაქტებზე.