ერთ წელიწადში ბათუმში ნაპირსამაგრი სამუშაოები დასრულდება. პროექტი, რომლის განხორციელებაც უკვე მიმდინარეობს, ახალი ბულვარის გაგრძელებაზე 2 კილომეტრი სიგრძის ნაპირსამაგრი ნაგებობის მოწყობას და სანაპიროს აღდგენას ითვალისწინებს. სამუშაოებს აზიის განვითარების ბანკი 30 მილიონი ლარით აფინანსებს.
მიმდინარე სამუშაოები აეროპორტის მიმდებარე ტერიტორიაზე დღეს პირველმა ვიცე-პრემიერმა დიმიტრი ქუმსიშვილმა და რეგიონული განვითარებისა და ინფრასტრუქტურის მინისტრმა ზურაბ ალავიძემ მოინახულეს.
„სანაპირო თითქმის წაღებული იყო და საფრთხეს უქმნიდა აეროპორტსაც, ამიტომ სამუშაოები იყო აუცილებელი. იმედი მაქვს, რომ ერთ წელიწადში მთლიანად დავასრულებთ და ბათუმის ამ ტერიტორიაზეც პრობლემები აღარ იქნება“, - განაცხადა ზურაბ ალავიძემ.
რეგიონული განვითარებისა და ინფრასტრუქტურის მინისტრმა დღეს ასევე დააკონკრეტა, რომ საფუძველს მოკლებულია ოპონენტთა მოსაზრებები იმის თაობაზე, რომ ნაპირსამაგრი სამუშაოები საფრთხეს შეუქმნის პლიაჟს.
ზურაბ ალავიძე ამბობს, რომ სამუშაოების დასრულების შემდეგ ახალ ბულვარს აუცილებლად ექნება პლიაჟი.