ე.წ. პიჯაკების საქმეზე მთავრობის ადმინისტრაციის პროტოკოლის სამსახურის უფროსი გიორგი მირცხულავა დაიკითხა, რომელიც 2009 - 2013 წლებში პრეზიდენტის ადმინისტრაციის პროტოკოლის სამსახურის უფროსის მოადგილედ მუშაობდა.
სახელმწიფო დაცვის სპეციალური სამსახურის ყოფილი უფროსის, ბრალდებულ თემურ ჯანაშიას ადვოკატი ბექა ბასილაია დაინტერესდა სახელმწიფო ბიუჯეტიდან უნდა ფინანსდებოდეს თუ არა პრეზიდენტის გარეგნობაზე ზრუნვის ხარჯები, როგორც მაკიაჟი, ასევე ბოტოქსი და თავის მოვლის სხვა საშუალებები, რათა პრეზიდენტი კარგად გამოიყურებოდეს, ვინაიდან ის ქვეყნის სახეს წარმოადგენს.
მოწმემ ადვოკატს უპასუხა, რომ ბოტოქსზე და სხვა თავის მოვლის საშუალებებზე პრეზიდენტმა კანონის მიხედვით პირადი ფინანსებით უნდა იზრუნოს. პირადად უნდა გაწიოს ხარჯები ასევე პიჯაკების და მისი პირადი ნივთების შესაძენად. სახელმწიფო ბიუჯეტის ასიგნებები, მოწმის თქმით, მსგავსი ხარჯების გაწევას არ ცნობს. თუმცა როგორც მირცხულავამ განაცხადა, პირადად მას შეხება არ ჰქონია ბოტოქსის და სხვა არალეგალური ხარჯების გაწევასთან. მოწმემ არც პრეზიდენტის ოჯახის წევრებისათვის გაწეულ ხარჯებში მონაწილეობა დაადასტურა და აღნიშნა, რომ მისი ინფორმაციით, პირველი ლედის ღონისძიებები მისი საქველმოქმედო ფონდიდან ფინანსდებოდა.
მირცხულავას თქმით, სააკაშვილის არაოფიციალურ ვიზიტებზეც გასწევდნენ ხარჯებს სახელმწიფო ბიუჯეტიდან. როგორც პრეზიდენტის ადმინისტრაციის ასიგნებებიდან ასევე სახელმწიფო დაცვის სპეციალური სამსახურის თანხებიდანაც.