გვიან ღამემდე გაგრძელდა გარყვნილი ქმედების ბრალდებით დაკავებული ინდოეთის ორი მოქალაქის დაკითხვა ისანი-სამგორის სამმართველოს პირველ განყოფილებაში.
განყოფილებაში ინდოეთის კიდევ რამდენიმე მოქალაქე დაიბარეს, თუმცა, ისინი ამბობენ, რომ მათთვის პოლიციის შენობაში კითხვები არ დაუსვამთ.
განყოფილების თანამშრომლებმა ჩატარებული საგამოძიებო ღონისძიებების შედეგად ინდოეთის რესპუბლიკის ორი მოქალაქე გუშინ დააკავეს.
გამოძიებით დადგინდა, რომ ბრალდებულებმა ვარკეთილში, დროებით საცხოვრებელ ბინაში არასრულწლოვნების მიმართ გარყვნილი ქმედება განახორციელეს.
საზოგადოებრივ მაუწყებელთან საუბარში ერთ-ერთი ბავშვის მშობელმა განაცხადა, რომ ბავშვები მეზობელთან სახლში ასვლას აპირებდნენ, რა დროსაც ისინი მეზობლად დროებით მცხოვრებმა მამაკაცებმა ბინაში შეიყვანეს, ტანისამოსი გახადეს და ფოტოები გადაუღეს. ამ ინფორმაციას ასევე ადასტურებს მეზობელიც. მათი თქმით, ბავშვებს გარეგანი ძალადობის კვალი არ აღენიშნებათ, თუმცა, იგეგმება მათთვის ექსპერტიზის ჩატარება.
გამოძიება სისხლის სამართლის კოდექსის 141-ე მუხლით გარყვნილი ქმედების ფაქტზე მიმდინარეობს. შინაგან საქმეთა სამინისტრო მომხდართან დაკავშირებით სხვა დამატებითი ინფორმაციას არ ავრცელებს.