სასტუმრო „ქორთიარდ მარიოტში“ საჯარო სამსახურების დაძმობილების პროექტის - „ტყის მდგრადი მართვის გაძლიერება საქართველოში“ გახსნითი ღონისძიება გაიმართა. შეხვედრის მონაწილეებს გარემოსა და ბუნებრივი რესურსების დაცვის მინისტრის მოადგილემ სოლომონ პავლიაშვილმა, ლიტვის რესპუბლიკისა და უნგრეთის ელჩებმა მიმართეს.
ევროკავშირმა ლიტვის რესპუბლიკის გარემოს დაცვის სამინისტროსთან და უნგრეთის სოფლის მეურნეობის სამინისტროსთან ერთად დაიწყო ახალი პროექტი, რომელიც დაეხმარება საქართველოს გააძლიეროს ტყის მართვის სისტემა ევროპული სტანდარტებისა და საუკეთესო ევროპული პრაქტიკის გათვალისწინებით.
პროექტი „ტყის მდგრადი მართვის გაძლიერება საქართველოში" განხორციელდება 18 თვის განმავლობაში. იგი ხელს შეუწყობს საქართველოში მიმდინარე სატყეო რეფორმის პროცესს და თავის წვლილს შეიტანს ქვეყანაში ტყის მართვის ეფექტური და მდგრადი სისტემის ჩამოყალიბებაში.
შეხვედრას პარლამენტის გარემოსა და ბუნებრივი რესურსების დაცვის კომიტეტის თავმჯდომარე კახაბერ კუჭავა, ევროპულ და ევრო-ატლანტიკურ სტრუქტურებში ინტეგრაციის საკითხებში სახელმწიფო მინისტრის მოადგილე არჩილ ყარაულაშვილი და საერთაშორისო ორგანიზაციების წარმომადგენლები ესწრებოდნენ.