ნატახტარის აეროდრომზე ავიაშოუ გაიმართა. ავიაშოუში სახელწოდებით "fly-fest-georgia" მონაწილეობა სპორტულმა და რეაქტიურმა თვითმფრინავებმა მიიღეს. სპორტული რეაქტიული თვითმფრინავებით ავიაშოუ "ბალტიისპირელმა ფუტკრებმა" შეასრულეს. "ბალტიისპირელი ფუტკრები" ექვსი პროფესიონალი მფრინავით დაკომპლექტებული ჯგუფია, რომლებმაც ნატახტარის აეროდრომზე საჰაერო-სანახაობრივი მანევრები და ფიგურული ფრენები შეასრულეს.

დღევანდელი საჰაერო შოუს ფარგლებში ასევე პარაშუტით ხტომა, პარაპლანით ფრენა და სხვადასხვა საფრენი აპარატებით მანევრირება მოეწყო.

ავიაშოუს ორგანიზატორები ავიაკომპანია "სერვისეარი" და ტურისტული კომპანია "ვანილა სქაი" არიან.

ორგანიზატორების განცხადებით შოუს მიზანია, საქართველოში საფუძველი ჩაეყაროს ავიაფესტივალს "Fly-fest-georgia". ავიაკომპანია "სერვისეარის" დამფუძნებლის ამირან მანჯავიძის განცხადებით ავიაფესტივალი მომავალ წელს ორი დღის განმავლობაში გაგრძელდება და მასში უცხოელ მფრინავებთან ერთად ქართველი პილოტებიც მიიღებენ მონაწილეობას. ავიაშოუ კი, ადგილობრივების გარდა ტურისტებზეც იქნება გათვლილი.

მსგავი ფესტივალები ყოველწლიურად იმართება ევროპის სხვადასხვა ქვეყანაში.