დიდი ბრიტანეთის პრემიერ-მინისტრმა ტერეზა მეიმ ლონდონის რაიონის კამდენის რამდენიმე კორპუსის მცხოვრებლებს მხარდაჭერა გამოუცხადა, რომლებიც სახანძრო უსაფრთხოების უზრუნველყოფის მიზნით, დროებით გამოასახლეს.

„ჩემი ფიქრები კამდენში ევაკუირებულებთანაა. მათ სახლებს უსაფრთხოების კუთხით ამოწმებენ“, - აღნიშნულია ქვეყნის პრემიერის ტერეზა მეის გვერდზე Twitter-ში.

ლონდონის რაიონ კამდენში საცხოვრებელი კომპლექსის - Chalcots Estate-ის ხუთი მრავალსართულიანი კორპუსიდან 800-მდე ოჯახი გაასახლეს. Sky News-ის ინფორმაციით, შენობების ფასადების მოსაპირკეთებელ მასალებთან დაკავშირებით, პრეტენზიები არსებობს და პრობლემის აღმოსაფხვრელად ოთხი კვირა იქნება საჭირო.

საცხოვრებელი კორპუსების შემოწმება ქალაქში მას შემდეგ დაიწყო, რაც 14 ივნისს მომხდარი ხანძრისას, 24-სართულიანი Grenfell Tower დაიწვა. ამ დროისათვის არსებული მონაცემებით, ხანძრის გამო დაიღუპა და უგზოუკვლოდ დაკარგულად მიიჩნევა 79 ადამიანი.