სტრასბურგის სასამართლოს გადაწყვეტილებების აღსრულებაზე, იუსტიციის სამინისტრომ პარლამენტს ანგარიში წარუდგინა.
მინისტრის მოადგილემ გოჩა ლორთქიფანიძემ დეპუტატებს სამინისტროს ანგარიში ადამიანის უფლებათა კომიტეტის სხდომაზე გააცნო. მინისტრის მოადგილის განცხადებით, ბოლო წლებში საქართველოდან სტრასბურგის სასამართლოში გაგზავნილი საჩივრების რაოდენობა ნორვეგიის სტატისტიკის მსგავსია. გოჩა ლორთქიფანიძის მიერ წარდგენილი ანგარიშით, 6 საქმეზე რომელზეც ადამიანის უფლებათა ევროპულმა სასამართლომ გასულ წელს საბოლოო რეზოლუციები მიიღო, ქართულმა მხარემ ამ საქმეებზე უკვე შეასრულა ყველა ვალდებულება. ასევე, მინისტრის მოადგილის ცნობით, ამ დროისთვის, 51 მიმდინარე საქმეზე მუშაობს სამინისტრო. გოჩა ლორთქიფანიძის განცხადებით, ეს დარღვევები ჩადენილია 2012 წლამდე. მისი თქმით, ამ ჯგუფს მიეკუთვნება ისეთი საქმეები, როგორიცაა გირგვლიანის, მოლაშვილის და 26 მაისის აქციის დარბევის საქმეები.
მინისტრის მოადგილეს ოპოზიციონერმა დეპუტატმა სერგო რატიანმა კითხა, რატომ არ მოხვდა ამ ანგარიშში ვანო მერაბიშვილის საქმეზე მიღებული გადაწყვეტილება, რაზეც ლორთქიფანიძემ აღნიშნა, რომ ეს გადაწყვეტილება გასაჩივრებულია და შესაბამისად, ჯერ სტრასბურგის სასამართლოს საბოლოო გადაწყვეტილება მიღებული არ აქვს, შესაბამისად, ამ გადაწყვეტილების აღსრულებაზე მუშაობა ვერ დაიწყებოდა.
სერგო რატიანი ერთადერთი ოპოზიციონერი დეპუტატი იყო, რომელიც სხდომას ესწრებოდა. ვანო მერაბიშვილზე დასმული კითხვის შემდეგ მან სხდომა რამდენიმე წუთში დატოვა.
კომიტეტზე ანგარიშის წარდგენისას, მინისტრის მოადგილემ აღნიშნა, რომ ბოლო წლებში შემცირებულია სტრასბურგის სასამართლოში გაგზავნილი საჩივრების ოდენობა.
მინისტრის მოადგილემ ასევე, აღნიშნა, რომ სტრასბურგის სასამართლოს გადაწყვეტილებების აღსრულებაზე პირველად ხდება ანგარიშის წარდგენა მთავრობის მხრიდან პარლამენტის წინაშე.
საპარლამენტო უმრავლესობის წევრებმა კომიტეტზე სიტყვით გამოსვლისას აღნიშნეს, რომ ეს დოკუმენტი კიდევ ერთხელ ახსენებს, თუ რა სახის ზეწოლა ხორციელდებოდა მოქალაქეებზე.
კომიტეტის წევრებმა კენჭისყრით დადებითად შეაფასეს ანგარიში.